Green Mizoram Day atan inpuahchah

Aizawl : May 1 khan Environment, Forest & Climate Change Minister TJ Lalnuntluanga kaihhruiana hnuaiah State Level Sub-Committee on Green Mizoram chu an thukhawm. 
    Meeting-ah hian nikuma ‘Green Mizoram Day’ hman dan thlirtletna leh kumina awmze nei leh hlawhtling zawka hman dan tur sawiho a ni. EF&CC Minister chuan Green Mizoram Day hman thin chuan mipuiah rah tha a chhuah zel a beisei thu a sawi a. Mizoram thing leh mau, nungcha humhalh a tihchangtlun kawngah mi thahnemngai tak tak an pungchho zel nia a hriat thu sawiin, lawmawm a tih thu a sawi. 

Internship Orientation Programme tan

Aizawl : Zoram Medical College atanga MBBS zirchhuak zirlai 68 te bakah Foreign atanga zirchhuak zirlai 6 te chuan May 1 khan ZMC-ah Internship an tan a. He mi puala Internship Orientation Programme neih chu Health Minister Dr R. Lalthangliana chuan khuallian niin a hmanpui.
    ZMC Lecture Hall-a hun hmanah hian Health Minister chuan ZMC zirlai ten Internship an tan thei chu thil chhinchhiahtlak tak, Mizoramin mellung a phun thar pawimawh tak a ni, a ti a. Hripui len nasat laia Dedicated Covid Hospital-a ZMC puan a nih avanga zirlaite harsatna tawh pawhin kian lam a pan mek chu lawmawm a tih thu sawiin, ZMC-a PG Course hawn a nih theih nan leh India rama Medical College tha ber pawl a nih theih nan a tan lak puiah kalkhawmte chu a sawm nghal bawk a ni.

MJA  Free Health Check-up a Hawng

Aizawl : May 1 khan Health Minister Dr. R. Lalthangliana chuan Aizawl Civil Hospital-ah Mizoram Journalist Association member-te tana buatsaih Free Health Check-up chu khuallian niin a hawng. 
    Hawnna inkhawm Doctors’ Seminar Hall-a neihah hian thusawiin Dr. R. Lalthangliana chuan Aizawl Civil Hospital chu khawpui hmun laili taka awm, damdawiin pawimawh tak a ni, a ti a. Damdawiin chu a hlui tawh avangin chei that tuma hmalak mek anih thu sawiin, MJA member-te chu free health check-up ngaipawimawh turin a ngen a. Mizoram sawrkarin chanchinbumi te hamthatna a ngaihtuah zel tur thu a sawi bawk a ni.

COVID-19 dinhmun thlirho

Aizawl :  May 2 khan Mizoram a COVID-19 hripui dinhmun thlirho a ni a. He hun hi Health & Family Welfare Minister Dr R. Lalthangliana'n a kaihruai.
    He thutkhawmah hian COVID-19 chungchanga Mizoram dinhmun uluk taka sawiho a ni a, hmalam hun hriat lawk a nih loh avang leh thil lo thleng leh thei turah damlote enkawl dan tur leh a hmachhawn dan tur, lo inruahman dan tur siam tha tih niin a buaipuitu turte an inruat nghal a, damdawi leh hripui dona hmanraw neih mek dinhmun zirchiana ruahmanna siam nghal tha tih nih bawkin, puipunna hmunah mask vuah tha tura mipuite inzirtir leh a tul tih sawi a ni bawk.

Minister C. Lalrinsanga’n Mizoram tan award dawng

Aizawl: Brahmaputra Board - High Powered Review Meeting chu a tum 12-na atan May 1 khan Guwahati-ah Union Minister of Jal Shakti Gajendra Singh Shekhawat kaihhruaina hnuaiah neih a ni.
    Kailash Choudhary, Hon’ble Union Minister of State (Agriculture and Farmers Welfare) bakah India rama hmarchhak state hrang hrang atangin Board member te an tel a, Mizoram aiawhin C. Lalrinsanga, Irrigation & Water Resources Minister a tel bawk.
    He hunah Ministry of Jal Shakti in National award an siam Mizoram PHED in a dawn- Mamit district in Fastest moving “Aspirational District” ram pum huapa lawman pakhatna leh Best Performing Aspirational district ram pum huapa lawmman pahnihna bakah, General category ah Kolasib in Best performing district in High achievers chhunga pathumna lawmman te chu Minister hian a dawng nghal a ni.

CM leh MZU Chancellor thar inkawm

Aizawl : Chief Minister Zoramthanga chu a pisa ah Mizoram University Vice Chancellor thar Prof. Dibakar Chandra Deka leh a nupui chuan hmu in an inkhawm.
    Prof. Dibakar Chandra Deka hian 1.5.2023 khan Mizoram University VC pangana ni turin a hna a zawm tan a. Ani hi Gauhati University ah M.Sc zo in, IIT Kharagpur atangin M.Tech zirchhuak lehin Tokyo Institute of Technology, Japan ah Post- Doctoral Diploma (DTTT) zo in Gauhati University atangin D.Sc in Chemistry a zo leh a ni.

Science Hackathon kharna nei

Aizawl : Rise and Shine, Samagra Shiksha leh Education Department buatsaih Mizoram pum huap Science Hackathon chu May 3 khan ATI Auditorium, Aizawl ah kharna hun leh lawmman semna hun buatsaih a ni a. Power Minister R.Lalzirliana chu khuallian a ni.
    Tun tum Science Hackathon hi Class 6 atanga Class 10 zirlai te tana buatsaih a ni a. Round thumah then niin Quiz round, live challenge leh final meet up neih a ni a. Zirlai titha zual sawm thlang chhuakin vawiin khan ATI Auditorium ah mipui hmaa project sawifiahna (presentation) hun an hmang a. An zing atang hian Government Mizo High School zirlai Lira Lalrinsangi, Class 9 chu titha berah niin cheng 10,000 a dawng a. Pahnihna chu Govt Chhinga Veng Middle School zirlai Lalrinzuali, Class 8 NIIN cheng 7000 a dawng a. Pathumna - Govt Mizo High School zirlai Lalhmangaihzuala, Class 10 chuan cheng 5000 a dawng a ni.

MP Speaker ten Mizoram Legislative Assembly kalphung rawn zirchiang

Aizawl : Zankhat riaka Mizoram rawn tlawh Madhya Pradesh Legislative Assembly Speaker Girish Gautam leh a thawhpuite chuan May 3 khan Aizawl an lo thleng a, anni hi Mizoram Legislatie Assembly zirchiang tura rawn kal a ni a, Speaker Lalrinliana Sailo chuan a lo dawngsawng.
     Girish Gautam leh a thawhpuite hian hmarchhak state pali Tripura, Mizoram, Assam leh Manipur te an tlawh dawn a. Mizoram Legislative Assembly hnuaia Financial Committee hrang hrang - Public Accounts Committee (PAC), Estimates Committee leh Committee on Public Undertaking (COPU) te hnathawh dan bakah 'paperless assembly' E-Vidhan kalpui dan te an rawn zirchiang a ni.

CM leh DoNER Secretary

Aizawl, : Chief Minister Zoramthanga chu 03.05.2023 khan Lok Ranjan, Secretary, Ministry of DoNER chuan a chenna CM bungalow ah an inkawm.
    Chief Minister leh DoNER Secretary chuan Mizorama investment kawnga hmasawnna tur chungchang an sawi dun a. Sawrkar laipuiin India hmarchhak a investor-te hnuhluh a, potential te kawhhmuh chu a ngaihpawimawh thu a sawi a. Mizoram ah pawh Mau a innghat industry tihlen leh tourism leh hospitality chu pawimawh a tihpui thu Chief Minister hi a hrilh a. Heng bakah hian education leh health sector chu investor te'n an ngaihven hle thu a sawi bawk.

DoNER Secretary hovin Ministry of DoNER hnathawh thlirho

Aizawl : May 4 khan DoNER Secretary hovin DoNER Ministry hnuaia hnathawh mek (project) te thlirhona leh zirchianna chu Aijal Club Conference Hall-ah neih a ni a. Chief Secretary bakah DoNER Ministry hnuaia hnathawh kalpuitu Department Secretary leh Director-te an tel a ni.
    Lok Ranjan, Secretary, Ministry of DoNER chuan Mizoram-in DoNER hnuaia project a kalpui te chu a tha thawkhat a ti. State-in project a kalpuinaah harsatna a neih te a rang lama chingfel turin hmalak a inhuam thu a sawi bawk. DoNER hnuaia project tam zawk chu hmasawnna ruhrel (infrastructure) tan hman a nih thu tarlangin mipui vantlangin chan tam zawk an neih theih nan social sector leh eizawnna (economy) chu ngaih pawimawh mek a nih thu leh helama ngaituahna thar seng turin a chah nghal bawk a ni. DoNER Fund a tihpun tur thu sawiin, Mizoram pawhin DoNER atanga sum a hmuh thin let thum a hmu thei tawh dawn a ni a ti.

Mizoram leh Assam Agriculture Minister inkawm

Aizawl : High Powered Review Board of Brahmaputra Board meeting neih zawh taka Mizoram aiawh a kal Minister C. Lalrinsanga chuan May 2, 2023 khan Assam state Agriculture Minister Atul Bora chu a chenna inah hmuin Agriculture hmalakna chungchangah titi pui na neiin thawhho dan tur te a sawi pui.
    Minister C. Lalrinsanga chuan hmarchhak state te inpawh leh tangrual zawka thawhho a ngaih pawimawh thu sawiin, agriculture lamah pawh thawhhona tha zawk an neih zel a beisei thu a sawi a. Minister te hian ramri chungchang te pawh sawi dunin, state aiawha hmalatu ten an hma lak mek kal zelah inremna tha tak an neih ngei theih a duh thu leh Assam  pawh inhawng leh zual tura a duh thu a sawi.

Home Commissioner hovin Manipur-a thil thleng chungchang sawiho

Aizawl : May 4 khan Mizoram Home Commissioner H. Lalengmawia chuan a pisaah Mizorama tlawmngai pawl  te, sawrkar hotute leh Mizoram chhunga Manipuri te aiawh All Mizoram Manipuri Association (AMMA) hruaitute a kawm.
    Manipur-ah Zohnahthlak hnam hrang hrangte leh Meitei te inkarah harsatna tun hnaiah a thleng a. Mizoram atangin Manipura lehkhazir leh hnathawka awm mek te bakah Zohnahthlak Manipur-a cheng te harsatna tawh mek chu Mizoram Sawrkar chuan a hriatpui thu leh sawrkar inbe Manipur-ah remna leh muanna a awm theih nan leh Zofate himna turin sawrkar chuan hma a la tih an sawi. Hemi chungchangah hian vawiin khan Home Commissioner chuan a pisaah MZP, CYMA, MUP, All Mizoram Manipuri Association (AMMA) leh Home Department hotulute a titi pui a ni.

CM leh DoNER Secretary hovin State Investment Workshop

Aizawl: Planning and Programme Implementation Department buatsaihin State Investment Workshop chu , 04.05.2023 khan Royale Lalawi Conference Hall-ah buatsaih niin, Chief Minister Zoramthanga leh DoNER Secretary LK Ranjan te'n an telpui a. 
    Workshop hi Ministry of DoNER bultuma Mizorama investment workshop buatsaih hmasa ber a ni a, kumin August thla a North East Global Investors Summit 2023 neih tur atana India hmarchhak state-te buatsaihna ni pah fawmin state pawn atangin potential investor 13 an lo kal a ni.