MPF Governing Board President thar ruat

Aizawl: 25.11.2025 (Thawhlehni) zing dar 7 khan Synod Committee Room No.1 ah Mizoram People Forum (MPF) Governing Board meeting neih a ni a, President Rev RC Lalnghakliana’n a kaihruai. 

  Meeting ah hian Kum 2026-2027 chhunga MPF President atan Rev. John Raldosanga, Mizoram Presbyterian Church (MPC) chu thlan a ni a. Kum 2026-27 chhunga MPF General Headquarters Budget atan Rs.14,18,000.00 ruahman a ni.

  Kumin chhunga MPF Office khar hun atan December 22, 2025 leh kumthara Office hawn hun atan January 8, 2026 ruat a ni a, MPF Annual General meeting hi December 18, 2025 ah Vanapa Hall ah neih tura ruahman a ni bawk. 

  Meeting ah hian tunhnaia Dampa Constituency a Bye- Election neih a MPF hmalakna te thlirletna hun hman a ni.

Vaibelchhe 13.33 man Methamphetamine man

Aizawl: India leh Myanmar ramri a ruihhlo che vel a awm tih an hriat bawhzuiin Assam Rifles te chuan World Bank Road, Zokhawthar, Champhai district-ah November 25 khan Methamphetamine Kg 4.444 an man.

  Methamphetamine mum an man te hi international markert ang chuan Cheng Vaibelchhe 13.33 man hu a chhut a ni, heng ruihhlo atana hman an man te hi Excise and Narcotics Department, Champhai te hnenah chhui zui atan leh dan anga hmalak a nih theih nan an hlan.

  He ruihhlo kaihhnawihah hian Myanmar lam mi mipa pakhat Bawi kanthanga chu man tel a ni.

Lirthei chesualah mi pahnih thi

Aizawl: November 24, 2025 zan dar 11:50 vel khan E. Lungdar leh Biate inkar, E. Lungdar atanga KM 1½ vel (PC Lungrem bulah) Champhai lam atanga kal Motor lian bungraw phur chu chesualin kawngthlangah a tla a, metre 150 vela thui a lum.

  Secretary, East Lungdar VC in a tarlan danin Motor ah hian Driver leh 2nd Driver chuangin, Motor neitu leh Driver ni bawk, Lalrinthanga kum 33 S/o Zodinthanga Champhai Zotlang chu a hmunah a boral nghal a, 2nd Driver Rualthanchama S/o Thanglawra Champhai Zotlang chu hliam na tak tuarin E. Lungdar PHC ah dah luh a nih hnuah ani pawh hi a boral ve leh a ni.

Reading Decathlon-ah tel

Aizawl: Nimin khan Indore, Madhya Pradesh ah Food4thought buatsaihin Reading Decathlon neih a ni a. Mizoram aiawhin school pahnih – Mount Carmel leh La Montessori Mizoram Youth Commission kaltlangin thlan an ni.

  Heng school thlanchhuah atang hian zirlai (student) pahnih ve ve – Rebek Malsawmzuali, Krista Roluahpuia Khiangte (Mt. Carmel School), Malsawmhlui Pachuau leh Joshua Lalawmpuia (La Montessori School) an kal a, anni hi State Level Competion winner an ni.

Cold Storage For Fisheries hawng

Aizawl: Fisheries Minister Lalthansanga chuan November 25, 2025 khan sangha vawn thatna tur, Cold Storage For Fisheries hawnna hun chu Ngaizel, Kulikawnah khuallian niin a hmanpui a, Cold Storage chu a hawng nghal a ni.

  He Cold Storage hi Special Assistance to States for Capital Expenditure (SASCE) 2020-2021 chhunga Integrated Fishery and Agro-based Processing Unit component, Horticulture Department Nodal-na hnuaia din niin, he project atan hian Rs. 123 lakhs hmuh a ni a. He Cold storage ah hian cold chamber pahnih awmin, sangha 16 tonnes vel vawng tha thei tura ruahman a ni. Thianghlim leh felfai zawka sangha zawrh chhuah theihna tur he cold storage building ah hian a ni.

Mizoram Larsap-in Rajya Puraskar Award a sem

Aizawl: Mizoram Larsap General (Dr) Vijay Kumar Singh chuan vawiin khan Raj Bhavan, Durbar Hall-ah Mizoram Bharat Scouts & Guides (MBS&G) in State Award a pek theih sang ber, Rajya Puraskar Award/ Governor's Award dawng tura thlan chhuahte hnenah Rajya Puraskar Award a hlan.

  Rajya Puraskar Award dawng thei tur hian Tritiya Sopan Level chin tal thlen a ngai a, Scouting/Guiding skill lama thiamna tha tawk tak nei, vantlang rawngbawlna leh hmasawnna kaihhnawih hmalaknaa tel tawh bakah Rajya Puraskar Scouts & Guides Testing Camp paltlang tawh an nih angai a ni. 2024 batch atangin Mizoram pumah Scouts & Guides 149 (Scouts 64, Guides 85) te'n he chawimawina hi an dawng a. District hrang hrang atanga Rajya Puraskar dawn dan chu hetiang hi a ni:

  1) Aizawl District - 100 (Scouts 42, Guides 58)

  2) Lunglei District - 16 (Scouts 8, Guides 8)

  3) Champhai District - 15 (Scouts 8, Guides 7)

  4) Mamit District - 10 (Scouts 2, Guides 8)

  5) Saitual District - 8 (Scouts 4, Guides 4)

Horticulture Minister-in Winter Fair, 2025 hawng

Aizawl: Horticulture Department Minister C. Lalsawivunga chuan November 25, 2025 khan Horticulture Department leh UD&PA Department bul tuma Mizoram Florist Association-ten an huaihawt MFA Winter Fair, 2025 chu khuallian niin a hawng a. Fair chhung atana inelna chi hrang hranga lawmman a sem nghal bawk a ni.

  MFA Winter Fair, 2025 pual hian huang hrang hrangah a hnuai a mi ang hian inelna buatsaih niin, lawmman semna hun hman nghal a ni bawk.

  Pangpar khawi: 1. Mass arrangement 2. Artistic 3. Ikebana

  Potted Show : 1. Seasonal A - Pot 11, 2. Seasonal B - Pot 31, 3. Perennial A - Pot 37 leh 4. Perennial B - Pot 29

Road Safety Week - Fimkhurna Hapta hawng

Aizawl: Zoram Drivers' Union (ZDU) buatsaihin November 25, 2025 khan 44th Road Safety Week - Fimkhurna Hapta (25th November, 2025 – 1st December, 2025) chu ZDU General Headquarters Office, Chaltlang Lily Veng, Sairang Road-ah Transport Minister Vanlalhlana chuan a hawng.

  44th Road Safety Week Aizawla hawnna hun hi F. Dosanga, President, Zoram Drivers' Union (ZDU) chuan a kaihruai a. Mizoram hmun hrang hrangah a rualin Road Safety Week hawnna hun hi hman a ni. Zoram Drivers’ Union hmalakna hian Lirthei khalh chungchanga Fimkhurna Hapta hi kum 1981 atanga khan Drivers’ Week tih hming puin hman tan a ni a. Kum 2007 atangin Road Safety Week tih a thlakin kumtin hman thin a ni.

Union Minister leh Agriculture Minister inkawm

Aizawl: Mizoram tlawh a rawn zin Shri Ram Nath Thakur, Union Minister of State, Agriculture & Farmers’ Welfare chu November 24 zan khan PC Vanlalruata, Minister chuan State Guest House, Aizawl-ah inkawmna an nei.  

  He hunah hian Lalthansanga, Minister, Land Resources, Soil & Water Conservation Department changtu bakah Agriculture & Farmers’ Welfare Department-a thawktute, Land Resources, Soil & Water Conservation, Irrigation & Water Resources, Horticulture leh KVK hotute an tel a. Union Minister of State leh amah rawn zuitute nen chawhlui an kil ho a ni.

  Union Minister of State Shri Ram Nath Thakur kawmna hunah hian R. Lalnunzira, Director, Agriculture & Farmers’ Welfare Department chuan kalkhawmte lawmna thu a sawi a. Pachhunga University College zirlaiten hnam lam entirin Zothantluangi, Joint Secretary chuan lawmthu sawina hun a hmang bawk a ni.

DIET Aizawl lehkhabu buatsaih release

Aizawl: Work Education Guidebook, District Institute of Education & Training (DIET), Aizawl buatsaih chu DIET Azawl Auditorium-ah School Education Minister Dr. Vanlalthlana'n November 24 khan a tlangzarh. 

  Work Education Guidebook hi March 2025 atanga September 2025 chhungin DIET Aizawl chuan an buatsaih a. He WE guidebook hi mi thiam hrang hrang: DIET, MZU, IASE, MBSE, SCERT, School Education Directorate leh he lama mi thiam bikten an ziah a ni. 

  Guidebook hi bu hniha then a ni a, Work Education Guidebook (Foundational & Preparatory) leh Work Education Guidebook (Middle & Secondary)-ah te then a ni. 

Mizoram Sawhthing buaipui dan turah inrawnkhawm

Aizawl: Mizoram sawrkar leh NITI Aayog, Government of India tangkawp chuan Mizoram sawhthing tharchhuah pung chho mek chungchanga inrawnkhawmna leh sawihona ‘Stakeholders Consultation for Mizoram Ginger Produce’ chu November 24, 2025 khan Vigyan Bhawan, New Delhi-ah an buatsaih a, Chief Minister Lalduhoma chuan a telpui.

  He inrawnkhawmna hi Chief Minister, Council of Ministers leh NITI Aayog te nena duan chhuah a ni a, a thil tum ber chu Mizorama kuthnathawktute tharchhuah sawhthing lei leh hralh kawnga harsatna sut kian dan tur sawihona leh market tha zawk, loneituten an hlawk pui lehzual tur dapchhuah tumna a ni. Hetiang inrawnkhawmna neih vawikhatna nia hriat a ni.

  Chief Minister hian inrawnkhawmna hlawhtling tak a awm theih nana hmalakpuitu Dr. VK Paul, Member, NITI Aayog leh NITI Aayog a thawktute chungah lawmthu a sawi bawk. Inrawnkhawmnaah hian sawrkar hotute leh industry aiawh mi 60 chuang an tel a ni.

Chief Minister leh DoNER Minister inkawm

Aizawl: Chief Minister Lalduhoma leh Jyotiraditya Scindia, Union Minister, DoNER te chu Ministry of DoNER office, New Delhi-ah November 24, 2025 khan an inkawm.

  Chief Minister chuan DoNER hnuaia Empowered Inter-Ministerial Committee thukhawmin ni August 19, 2025-a a lo pawm tawh Pukzing - Silsury kawng leh Champhai - Tualpui kawng siamna tur bakah Mizoram chhunga Oil Palm Link Road siamna tur sum chu sanction thuai turin a ngen a. DoNER Minister chuan sum awmdan a zirin tun Financial Year-ah emaw Financial Year tharah pawisa hi sanction ngei an tum thu a lo hrilh a ni.

  Chief Minister hi Lalnghinglova Hmar, Minister; KC Lalmalsawmzauva, Adviser to Chief Minister leh R Lalrodingi, OSD to Chief Minister ten an tawiawm a ni.

ZMC&H ah World Antimicrobial Awareness Week Kharna nei

Aizawl: Zoram Medical College & Hospital, Falkawn-ah Novermber 24, 2025 khan World Antimicrobial Resistance (AMR) Awareness Week kharna hun hman a ni a. Thupui thlan bik hmangin Speaker leh Moderator te nen zir hona hun hlawhtling taka hman a ni.

  He Awareness week hi Antimicrobial Resistance Programme hnuaia NCDC, Ministry of Health & Family Welfare, Govt. of India buatsaih a ni a. Zoram Medical College & Hospital (ZMC&H)-a Microbiology Department ten an organise a ni. He awareness week den chhen hian 2nd year MBBS zirlaiten poster leh slogan in ziah siakna an nei bawk. He AMR Awareness week thupui ber chu "Continuing Professional Development, Act Now: Protect our present, Secure our future" tih a ni. He week kharna inkhawmah hian Prof Swati M Patki, Dean hnen atangin member kalte lawmna thu ngaihthlak a ni a.

CM leh Union Railway Minister inkawm

Aizawl: Delhi-a cham mek Chief Minister Lalduhoma leh Ashwini Vaishnaw, Union Railway Minister te chu November 24, 2025 khan New Delhi-a Railway Bhawan-ah an inhmu a, inkawmna hun tha tak an nei. 

  An inkawmnaah hian Sairang to Thenzawl Railway Extension chungchang, Sairang to Guwahati Rel kal hun chungchang, Sairang to Delhi Rajdhani Express chungchang, Kolkata to Sairang rel chungchang, Silchar - Bairabi to Sairang Rel Flag Off chungchang, Mizoram ILP Portal awmsa IRCTC Train Ticket Portal a dahluh chungchang leh Warehouse/Cold Storage chungchang te an sawidun.

  Chief Minister hi Dr KC Lalmalsawmzauva, Adviser to Chief Minister (Handholding Policy) leh R Lalrodingi, OSD to Chief Minister ten a tawiawm a ni.

Greenfield City proposal siam mek thlirho

Aizawl: Core Committee on Thenzawl Peace City te chu November 26, 2025 khan CM Conference Hall-ah an Chairman Chief Minister Lalduhoma hovin an thukhawm a. Thenzawl Peace City huam chhunga Greenfield City proposal siam mek an thlirho.

  Lalmalsawma Pachuau, Secretary, UD&PA chuan SASCI ah hian Urban Planning Reforms hnuaiah tinzawn bik neia (thematic) Greenfield City kalpui theihna component Rs.150 Crore vel hmuh theihna a awm a, inelna (on challenge mode) atanga hmuh tur a ni. Thenzawl Peace City huam chhunga Tourism leh AH & Vety Department ramte behchhanin he fund hmuh theihna tur Greenfield City proposal hi duan a ni, tiin meeting koh a nih chhan a sawi.

  Thenzawl Peace City Master Plan siamtu tura thlan IPE Global mithiamten Greenfield City proposal hi a lem nena entirin chipchiar takin an sawifiah a. An ruahmanna siam hi Core Committee hian a pawmsak a, Ministry of Housing & Urban Affairs ah thehluh a ni ang.

MAHFED leh BBSSL ten thawhhona thuthlung ziak

Aizawl: Cooperation Department changtu Minister PC Vanlalruata hovin Mizoram State Agri, Horti, Forestry and Marketing Cooperative Federation Ltd (MAHFED Ltd) leh Bharatiya Beej Sahakari Samiti Ltd (BBSSL) te chuan Cooperation Minister Office chamber, MINECO-ah November 26 khan thawhhona thuthlung (Memorandum of Understanding) an ziak.

  MoU hi MAHFED aiawhin H. Vanhlupuia, Managing Director MAHFED Ltd. leh BBSSL aiawhin Dr. Omveer Singh, Adviser BBSSL te chuan an sign a ni.

  BBSSL hi India ram pumpui a thlai chi buaipuia ram pawn thlenga thawn chhuak thin an niin, National Cooperative Society an ni a, an ni hian thlai chi tha supply turin Cooperation department kal tlang in Nodal Agency a thlan an nih angin MAHFED te nen hian an thawkho dawn a ni.

Larsap hovin Constitution Day lawm

Aizawl: India ramin ama puala Danpui duan hman theih tura a pawmna ni pawimawh tak, 'Constitution Day - Samvidhan Diwas' lawmna chu India ram hmun dangte rualin November 26, 2025 khan Gauhati High Court, Aizawl Bench-ah hman a ni a. He hun hi Larsap General (Dr) Vijay Kumar Singh chuan Khuallian niin a telpui a ni.

  British laka Indiain zalênna a hmuh khan India chuan ama pual Danpui (Constitution) siam tur member 299 awmna, Constituent Assembly a din a. Ni 165 chhungin Constituent Assembly chu vawi 11 a thukhawm hman a. 

  Danpui an duante remkhawm leh siamrem hna thawk turin August 29, 1947 khan Drafting Committee, Dr. B.R. Ambedkar, Father of Indian Constitution tia koh Chairman-na hnuaiah din a ni a. November 26, 1949 a Constituent Assembly thukhawm chuan India Danpui siam chu lungrual takin a pawm ta a. January 26, 1950 khan India Danpui chu hman tan a lo ni ta a ni.