Tuichawng group YMA in raltlan tanpui

Aizawl : Bangladesh raltlante tanpuina tur, CYMA atanga Rs. 5,00,000 an dawn atangin, Tuichawng group YMA chuan 19.9.24 khan buhfai an sem.

   Tuichawng group YMA huanchhung khaw paruk (6) ah raltlan hi an awm mek a. Tun tum a buhfai an sem dan tlangpui chu mi pakhat zelah kg. 4 hisap a ni. Pawisa chuang bang tlem a zawng awm pawh an mamawh huna sem leh atan an ruahman sak bawk.

   Tuichawng group huamchhung a Bangladesh raltlan khaw paruk a awm zawng zawng chu 1,387 an ni.

Commonwealth-ah silver medal la

Aizawl : Mizo rawlthar rit chawi chak, Lalruatfela chuan September 19, 2024 khan Commonwealth Junior Weightlifting Championships neih mekah silver medal a la.

   Fiji khawpui, Suva-ah Commonwealth Weightlifting Championships Youth, Junior leh Senior neih mekah hian Bungzung tlangval, Ruatfela hian snatch-ah kg 135 leh clean & jerk-ah kg 166, a vaiin kg 301 chawiin kg 89 huangah silver medal a la.

   He huangah hian a thlengtu ram rit chawi chak, Elder Nehemiah chuan snatch (kg 141) leh clean & jerk (kg 172), a vaiin kg 313 chawiin gold a la a. Ruatfela hnuaiah hian India aiawha inlan dang, Das Hrudananda, a vaiin kg 299 chawitu chuan bronze medal a la thung.

BCM leh Champhai grape chingtuten inremna ziak thar

Aizawl : Mizoram Baptist Kohhran leh Champhai Grape Grower Society (CGGS) chuan kum hnih chhung atan September 16, 2024 khan Lalpa Zanriah buatsaihnaa hman tur sacramental wine chungchangah inremna thuthlung an ziak thar.

   Thawhtanni tlaia Champhai Winery, Tlangsama inremna thuthlung ziah tharna inkhawmah hian BCM aiawhin General Secretary Rev. Dr. R. Lalbiakliana, Rev. Vanlalnghaka Jongte leh Upa Biakchungnunga, Office Superinendent ten hming ziakin CGGS atangin an chairman, HS Vanlalfakzuala leh General Secretary C. Zohmingliana ten an ziak a. K. Zonunsanga, DHO, Champhai distrirt-in a ziak bawk.

   Inremnaah hian ‘sacramental wine bottle khat, 750ml, Rs. 150 man chu excise duty, road tranport leh permit te BCM hian a buaipui ang a; a quality, bottle, colour, acidity, taste leh a rim te chu inremna ziaktute pahnih remtihna lovin tihdanglam theih a ni lo vang’ tih tar lan a ni.

Amritsar-a a chennaah thi in hmu

Aizawl : Lalremruati (32) D/o Lalsangliana (L) Bairabi Hmar veng chu hnathawka a awmna Amritsar, Punjab-a a chenna-ah September 18, 2024 khan thiin hmuh a ni.

   Lalremruati hi Elegant Spa Mall road, Amritsar Punjab a kum 1 a thawh hnuin, Lorance Road-a Saloon ah a insawn a, ni 15 vel a thawk hman ni a hriat a ni.

   A inluah neitute sawi danin 17.9.2024 zingah a pum nawm loh thu a sawi a, hna pawh a kal lo. Tlai dar 3 velah a tuihal thu a inluah netute te bula a sawi hnuin, a hnu tlai dar 4-ah Hospital pan mai a duh thu a sawi leh a, hetih hunlai hian a inluah neitu ten an hna lama an buai thu an lo hrilh a, an kalpui ta lo. An va hmuh leh chuan a lo boral tawh niin an sawi.

Lammual chhehvel tuiluankawr enfiah

Aizawl : CESJ hruaitute leh DIG Assam Rifles te chuan Lammuala tuiluankawr (drainage) mumal lo avanga Bethlehem leh Tuithiang lam ngaw lei min a hlauhawm thu an sawi chu September 17, 2024 khan CESJ hruaitute leh Geologist te nên endik.

   CESJ chuan AR Lammualah hian tuiluankawr mumal pakhat mah a awm lo tih chu an hmuh dan a ni a, heng tui luanchhuahna mumal lo takte hian a thlang lam vengte dinhmun hlauhawm zawkah a din tir bawk niin a lang an ti.

Naupang leh MHIP ten faina hnatlang nei

Aizawl : September 16, 2024 zing khan Mamit-ah Children Sanitation Club leh MHIP Bazar Veng Branch bultumin Faina hnatlang neih a ni. Thawk chhuak te hi an vaiin Mi 70 vel an ni a, Kawngpui kam leh bazar hmun te thenfai a ni.

   Hnatlanga chhuak khawm te ei leh in hi. Bazar Veng VC-in an tum sak a, VCP Lalthakima leh a thawhpuiten hnatlang hi ho in Faina hna an thawh zelna tur ah ei leh in lam tumsak zel an inhuam thu an sawi bawk.

CM leh Lirtheia sumdawngte inkawm

Aizawl : Chief Minister Lalduhoma chuan September 16, 2024 khan a office-ah Mizoram Commercial Vehicle Union hruaitute a kawm a, an harsatna te a sawipui.

   Chief Minister chuan kuminah India ramin ruahtui kan dawng tha a, tuilian leh leimin a tam a. Chhiatna pawh a nasain kawngpui then fel nan pawh hian sum leh pai a kal tam a, tum anga hma kan lak chak theih loh chhan ber a ni, a ti a. Ruahtui vanga harsatna te hriatthiamsaka min lo ngaichang turin a ngen a, Sawrkar hmalak dan te a lo hrilh.

   Chief Minister hi Vanlalhlana, PWD leh Transport Minister leh TBC Lalvenchhunga, Adviser to CM (Finance) bakah PWD Official pawimawhten an tawiawm.

Ruihhlo chungchangah inrawnkhawmna nei

Aizawl : September 16, 2024 khan Excise & Narcotics Minister Lalnghinglova Hmar hovin BDO Conference Hall, Darlawn-ah ruilhhlo do chungchang hmalak zel dan tur sawi hova inrawnkhawmna neih a ni.

   Excise & Narcotics Minister Lalnghinglova Hmar chuan ruihhlo do chungchanga sawrkar hmalakna te tarlangin, Darlawn khawtlangin ruihhlo do an kalpui zelna turah sawrkarin theihtawp chhuahpui a inhuam thu a sawi a; Kohhrante pawh hemi kawngah hian nasa lehzual zawka hma la turin a ngen a. Zirna in, school leh college-ah te ruihhlo ti lo tura inzirtirna nasa zawk kalpui a tul thu sawiin, zirtirtute pawh tan la thar leh turin a ngen a ni.

   He hunah hian Darlawn khawchhunga Sawrkar Department hrang hrang, tlawmngai pawl, Kohhran leh Kohhran thalai pawl aiawhte an tel a ni.

Airport kawng Pukpui bul kawng bal siam zo

Aizawl : Ruah sur nasa avanga July ni 9-a Airport kawng Pukpui bula kawngpui sir hêk chu September 17, 2024 khan PWD NH Division-I te chuan a siam that hna thawkin tunah chuan lirthei chi tin kal theihin peih a ni tawh.

CM-in IOT Device Deployment hawng

Aizawl : Chief Minister Lalduhoma chuan Thenzawla Mizoram Handloom Export Facilitation Hub ah IOT Device Deployment in the state of Mizoram chu September 17, 2024 khan a hawng.

   Chief Minister chuan, mi tam tak eizawnna Mizoram Handloom hian hma a sawn zel a ngai a, sawrkar lam a thawktute pawhin nasa leh zuala ke pen a ngai. Kalphung tharah Project kawng bo awm lovin, a hmang tangkai tur te hnen thleng ngei zelin hna thawh tur a ni. State dang an lohna a awm a, Project ziaktute pawhin hei hi hria a, hnam leh a mite mila project ziah thiam a pawimawh. ZOHANDCO pawh tih chak zel a tul. NEHHDC leh agency dang kan tana tangkai turte kuangkuah chungin an kal zel tur thu a sawi.

Fai beihpui thlakna UD&PA Minister-in hmanpui

Aizawl : September 17, 2024 zing khan Mizoram Youth Commission (MYC), Auditorium, MINECO-ah, UD&PA leh PHE department tangkawp te chuan kar hnih (17th September -2nd October) chhung awh tur SWACHHATA HI SEVA(SHS),2024) khuhhawnna programme leh Faina hnatlang an buatsaih a. Hon’ble Minister Pu K.Sapdanga chuan khuallian niin SHS,2024 khuhhawnna programme hi hmanpui.

   Swachhata Hi Seva, 2024 hian thupuiah Swabhav Swachhata( Innate Cleanliness), Sanskaar Swachhata (Cleanliness of thought, Value and culture) tih hman a ni.

NH 306 & 06-a tangkhangte dinhmun enfiah

Aizawl : Sepetember 16, 2024 khan senior CMO, kolasib District hmalaknain Tuitun leh Khamrang inkar kawng a Motor tang khang mek driver te an zun leh ek thiarna hmun te enfiah in an hriselna dinhmun endikna neih a ni bawk.

   Motor khalhtu te hriselna dinhmun an endikna ah hian damlo enkawl ngai leh damdawi pek ngai hmuh a ni lova. An mamawh tur thosilen a thlawnin an sem nghal bawk ani. Hei bak ah hian an lo inthiar tawh dan te zawhfiah niin, natna inkai darh thei lak ah harsatna a thlen loh nan, lei lai khuara lo chilh tha leh zel tura hriattir in hriselna kawnga zirtirna an pe nghal bawk a ni.

Health Minister hovin Nightingale Awards 2024 dawng lawmpui

Aizawl : India rama Nursing lama thawk tha National Florence Nightingale Awards 2024 chawimawina dawngtu mi 15 thlan chhuah zinga tel H. Mankimi, Ward Superintendent (Rtd.), Serchhip IOC Veng lawmpuina hun chu September 16, 2024 khan khan Health & Family Welfare Department Minister Lalrinpuii hovin hman a ni.

   Award dawngtu H. Mankimi pawhin thu sawiin, Health & Family Welfare Minister-in lawmpuina a buatsaih avangin lawmthu a sawi a. A hnathawh chhunga nu leh naute dinhmun a ngaihpawimawh thin dante leh rinawm taka hna a thawh thin dante a sawi a. Amah ang bawka nurse hna thawkte chu an rawngbawlna ngaipawimawh tur leh inpekna nena theihtawp chhuah thin turin a sawm a ni.

Buhhum hralh dan tur ngaihtuah

Aizawl : September 18, 2024 khan Chief Minister Lalduhoma hovin Mizoram State Government Paddy & Rice Procurement Committee te chu CM Office-ah an thukhawm.

   Mizorama buh chingtuten hlawk ve tawk taka an buhhum an hralh theih dan tur a ngaihtuah a. An lo zirchian tawhna behchhanin vawiin hian ruahmanna an siam.

   Handholding Scheme nena kal kawp turin sawrkarin Mizoram thar chhuah buhhum ah support price a pe dawn a. A bultan nan kuminah Kolasib leh Mamit district ah kalpui phawt tur a ni. A kalpui dan tur kimchang hi Hand Holding Scheme hawnnaah puan a ni.

National Highway (NH) 06, Kawnpui leh Khamrang inkar kawng tlawh

Aizawl : Public Works Department (PWD) Minister Vanlalhlana chuan September 18, 2024 khan tunhnai ruahtui tla nasa avanga National Highway (NH) 06, Kawnpui leh Khamrang inkar kawng chhia chu a hmunah tlawhin hmalakna kal mek a enfiah bakah hmachhawpte Official leh hemi kaihhnawih lirtheia eizawngte a sawipui.

   Kawnpui quarry bul leh Sethawn RTP peng bula NHIDCL kawng siam avanga harsatna thlengte a enfiah nghal bawk. PWD Minister hi Dy. Speaker Lalfamkima'n a tawiawm a ni.

   PWD Minister chuan NH 06 chu Mizoram chak lakna kawngpui pawimawh tak a nih avangin kawng chhiate hmanraw neih ang ang pawt khawma theihtawp chhuaha buaipui a nih thu a sawi.

CS Dr. Renu Sharma NECTAR meeting ah tel

Aizawl : Chief Secretary Dr. Renu Sharma chu North Eastern Centre for Technology Application and Reach (NECTAR), Governing Council meeting vawi 12-na, New Delhi a neih ah , September 18, 2024 khan a tel.

   CS hian Meeting-ah kawng hrang hranga Hmarchhak bial hmasawnna atana tunlai thiamna hman tangkai dante sawiho a ni. Chief Secretary chuan project 2 (Mass production of commercially important plants of Mizoram in Tissue Culture Technique leh Establishment of Mizoram’s first naturopathy Centre – integration with Indian Traditional Health System) atana Detailed Project Report-te chu Prof. Abhay Karandikar, Secretary, Department of Science & Technology, Government of India hnenah a thehlut.

SYS Minister-in Airfied hmunhma tlawh

Aizawl : Sports Minister Lalnghinglova Hmar chuan September 18, 2024 khan Tuirial-a Sports & Youth Services Department ram atana ruahman BSF awmna leh Tuirial Airfield hluite a hmunah kalin a enfiah.

   Sports Minister hi Rakesh Panwar, BSF Commandant-in lo dawngsawngin an ram luah lai hi Compensation 3.5 lakhs-in Sports Department-in tangkai zawka an hman atan an kutah hlan an tum a. He hmunah hian nakin huna rampum huap Sports Event a thlen pawha dawlzo thei turin Project siam dan turah hmalak tum a ni.

   Sports & Youth Services ram tur atana thlitlaiah hian BSF 38th Battalion an awm mek a. BSF awmna bik ram zau zawng hi acre 3.19 (11.23 bighas) a ni.

Bana Kaih Scheme tlangzarh

Aizawl : September 19, 2024 khan Mizoram Sawrkar Flagship programme 'Bana Kaih (Handholding) Scheme' chu Chief Minister Lalduhoma'n Vanapa Hall, Aizawl-ah a tlangzarh. Scheme book pahnih 'Bana Kaih Mizoram Handholding Scheme' leh 'Thlai thar hralh dan tur kaihhruaina tawi' bakah Digital Portal a hawng nghal bawk.

   Lalduhoma chuan, hun rei tawh tak atanga an suangtuah tawh thin 'Bana Kaih Scheme' tlangzarh a ni ta chu lawmawm a tih thu sawiin, policy a hlawhtlin theih nana theihtawp chhuahtu leh thlawp tlat thintute inpekna ropui a tih thu a sawi.

   Thlai thar lei sak theih tur mi 45585 vel portal-a ziah luh an ni tawh a, a zat hi la danglam thei a ni. An zinga Sawhthing chingtu inziaklut tawh 25,154 atangin quintal 10,84,975; Aieng chingtu 3,414 atangin quintal 77,492; Hmarchate chingtu 8,517 atangin quintal 36,774 leh Hmunphiah chingtu 8,500 atangin quintal 1,20,000 thar chhuah beisei a ni a ti.