Thuthlung ziak Ni 18.9.2017 (Thawhtanni) khan PHE E-in-C pisa ah PHE Department leh CYMA chuan tuihna humhalh leh a awmsa tih pun kawnga thawhdunna thuthlung an ziak a. PHE Department aiawhin Engineer-in-Chief Lalmuanzova chuan hming ziakin CYMA aiawhin CYMA President Lalbiakzuala chuan hming a ziak bawk a ni. Complaint Zodintluanga s/o Rothangpuia, Tuikual chuan ni 18.9.2017 (Thawhtanni) khan MNF party chanchinbu Hruaitu Arsi Editor Lalthanzuala Hnamte, Khatla South leh Publisher M.C. Lalrinthanga, Khatla South-te chungah Hruaitu Arsi chanchinbu dt. 01.09.2017 chhuaka "Lalthanhawla'n CBI a hlau" tih thupui hmanga thuchhuah avangin Magistrate First Class, Aizawl hnenah 'Criminal Complaint' a thehlut. CM in hawng Chief Minister Lal Thanhawla chuan ni 19.9.2017 (Nilaini) khan New Secretariat Complex-ah Irrigation & Water Resources Department(I&WRD) Office Building thar a hawng. Lawmpui September ni 3-9, 2017 chhunga Gold Coast, Australia-a Commonwealth Weightlifting Championship neiha India aiawha a tel Jeremy Lalrinnunga leh Zakhuma ten Youth 56Kg category-a Gold Medal leh Silver Medal an dawn lawmpuina leh anmahni chawimawina hun chu ni 19.9.2017 (Nilaini) khan Sports & Youth Services Minister Zodintluanga pisa-ah neih a ni. Rally Ni 19.9.2017 (Nilaini) zing khan Indian Society on Tobacco & Health Mizoram Chapter, Mizoram State Tobacco Control Society leh TATA Trust hnuaia Center for Microfinance and Livelihoods tangkawpin an buatsaih No Tobacco Rally chu Health Minister Lal Thanzara’n Millenium Center kawtah a vailiam. Rally hi Vanapa Hall kawt thleng neih a ni. MNYF in hal Ni 19.9.2017 (Nilaini) khan MNF Thalai te chuan dik lo taka cheng nuai tam tak siam nan a hman nia sawi, Zo-Carbon Industry Sakawrtuichhun-a mi chu a hmun ah tlawhin sawrkar in a kalpui dan diklo nia an hriat lekha copy an hal. Exhibition I&PR Department leh Mizoram Art Development Society tangkawp chuan ni 19.9.2017 (Nilaini) khan MADS Annual Art Exhibition 2017 chu Assembly House Annexe Building garage-ah an nei. Puang thar Mizoram sorkar chuan ni 19.9.2017 (Nilaini) khan thuchhuah siamin kum 2018 Mizoram sawrkar Holiday list a lo siam tawh chu tidanglam hretin Missionary Day Jan 11, YMA Day June 15 leh MHIP Day July ni 6 te chu holiday list ah a telh leh. Enfiah tum Ni 19.9.2017 (Nilaini) a Mizo Students’ Union extended OB thukhawm chuan Myanmar atanga Mizoram kal tlanga kuhva rah sumdawnna khawih hnamdang te’n an bungrua an kalpui danah thil fel lo tam tak a in phumru ni in an hria a, he thil hi a tul ang a enfiah a sawrkarah hmala tura thlen an tum thu an sawi. HIV Mizoram State Aids Control Society chhinchhiah danin kum 1990 atanga kumin March thla thleng khan Mizorama thisen endik tawh 605119 atangin HIV hrik pai 14,632 hmuchhuah a ni tawh. Inbia Mizoram sawrkar leh Lalhmingthanga Sinate kaihhruai HPC (D) phel leh lam aiawhte chu remna kawng zawngin ni 21.9.2017 (Ningani) khan State Guest house Chaltlang-ah inbiakna an nei. Ban phut BJP Mizoram Pradesh chuan ni 21.9.2017 (Ningani) khan Mizoram Governor hnenah Sept. ni 19 a Political Adviser to Chief Minister-a atana ruat Lalrinmawia Ralte MLA chu a nihna atanga bantir turin lehkha an thehlut. Faina State Level Cleanliness Week Committee chu ni 21.9.2017 (Ningani) khan an Chairman Zodintluanga, UD&PA Minister hovin a pisaah an thukhawm a, faina hapta hman dan tur an rel. Kawng sawiho Ni 21.9.2017 (Ningani) khan Mizoram PWD hotute chu Principal Secretary kaihhruaina in Engineer-In-Chief, Conference Hall ah PWD enkawl kawng siamthat mek leh hmalak zel dan tur an sawiho. Inkawm Development of North Eastern Region (DoNER) Minister Dr. Jitendra Singh chuan ni 21.9.2017 (Ningani) khan Governor Lt. Gen. Nirbhay Sharma chu a chenna Raj Bhavan-ah a kawm.