Aizawl; Tunhnaia Thenzawl ram chhunga thing pakhat atanga tui far leh ruah sur ang deuh hial a awm chu mithiam te chuan thil mak vakah an ngai lo a, zirchian zel erawh an tum.

Thenzawl Vengthar ah April thla tir lam khan thingkung pakhat atangin zan 20 chhung vel zet chu tui a far a, a chang chuan ruah sur ang maiin a awm niin an sawi a. He thilthleng hi Mizoram University leh Pachhunga University College atanga mithiam te chuan a hmunah kalin thil awmdan an zirchiang a. Mahse an kal lai hian thingkung atanga tui far hi a lo reh hman tawh avangin an duh angin an zirchiang thei lo a, karleh lam hian zirchian leh an tum.

Helai hmun tlawhtu zinga mithiam kal zinga mi ZALEN in a biakna ah helai hmun an tlawh lai hian tui far/ruah sur hi a awm tawh loh avangin duh angin an zirchiang thei lo tih an sawi a, mahse thing hnah leh lei (soil) erawh zirchian atan an hawn thung. Helai hmun tlawhtu zinga mithiam kal pakhat chuan, "Thing leh thlai thenkhat hian tui an pai hnem lutuk chuan an pechhuak leh thin a. Heng thlai te hi chhun lamah an stomata inhawngin zan lamah a inkhar avangin tuihu an pechhuak leh thin a. Thenzawl bula thing ang hi khawvel hmun dangah pawh a awm avangin thil mak vakah kan ngai lem lo a ni," a ti.

Mithiam te chuan thing ruahsur bul maiah hian PHE pipe a kal nia an sawi avangin thing zung hian tui tling hi hip khawmin a pechhuak leh pawh anih theih thu ZALEN an hrilh bawk