Aizawl: MNF Treasurer Vanlalzawma chuan, “Thiamna hi khawtlang leh ram hmasawnna tura thil pawimawh ber a ni,” a ti.
Mizo Zirlai Pawl (MZP), Ailawng Branch ten nimin Khuangchera Hall-a an khuaa zirlai ti thate chawimawina hun an hman naah khuallian nia he thu hi sawiin MNF Treasurer Vanlalzawma, Ex MP chuan, “Zirlai nih laiin a lian ber te, chak ber leh huai berte an thanlen hnuah an lal ber lo va, lehkha thiam leh a ti tha peih peihte an thu in an lal zel tawh a ni,” tiin zirlaite chu hlawhtling tuma chhel taka zirlai zir turin a chah a ni.
Khuallian chuan, “Zirtirtu tan senior tawh tih ringawt avanga inthlahdah a thiang lova, tihdan ngai hman rengte a fuh lo thei a, naupang mize mila zirtir kawngah theihtawp chhuah a tul a ni,” a ti bawk.
Chawimawina hun hi Ailawng MZP Branch President R.Lallawmsanga'n a kaihhruai a; Mizoram University-a Mizo Department zirtirtu Dr. Ruth Lalremruati’n zirlaite fuihna thu a sawi bawk. MZP-in an chawimawite hi 2018-’19 academic session a an khaw Primary , Middle leh High School zirlai, distinction-a passed mi 42 niin, chawimawina leh lawmpuina thuziak an hlan a ni.