Aizawl August 26, 2024 : Vawiin khan BJP Mizoram State Office, Mipui Run, Upper Republic ah Karthar Inhlanna leh Political Session neih niin, thusawitu State President Vanlalhmuaka chuan thil awmsaah pawh State sawrkarin a tih tur a ti lo thin chuan hmasawnna a tithuanawp thin a ti.

Vanlalhmuaka, State President chuan, "Lengpui Airport siamna tur sum hi pek ni tawhin hmasawnna erawh a kal muang hle mai a, Central hian kan State hruaitute ai hian min ngai pawimawh zawk hle niin a lang. Four Lane kawngpui pawh hi Central hmalakna a ni a, sum pawh awm sa a ni. Nimahsela vawiin thlenga kawng tha kan neih theih loh chhan chu State Sawrkar hian kawng siamna tur atan a tih tur a tihfel loh vang a ni thung a ni."

"Sawrkar hian Ram hmasawnna aia ngaih pawimawh dang an nei thin a, Compensation buaiin kan buai a, vawiin thlenga Vairengte leh Aizawl inkar kawng chhiat vangin kan buai phah ta a ni. Chuvangin Mipui hian thil tak tak kan ngaihtuah a ngai a ni. Aizawl khawpui tawt lutuk leh Traffic Jam nasa lutuk tih ziaawmna tur Aizawl By-Pass Road siamna tur pawh Central chuan Crore 500/- min pe a, vawiin thleng hian hnathawh theih a la ni lo hi a buaithlak. Mizoram hian State dang hmasawnna kan hmuin kan thlir a, kan kawtkaia awm tur erawh chuan a ngaihna kan hre lo, mimal anga hlawkna kan tel ve theih dawn loh chuan kan tikhawtlai duh thin ni pawhin a lang a ni," a ti.

Vanlalhmuaka chuan, "PM Schemes hrang hrangte Mipui te'n kan hman tangkai theihna turin National hruaitute nen Meeting kan neihna ah kan sawi a, a bikin MUDRA LOAN te pawh Central-in Bank hrang hrangah Loan pe turin ruahmanna a siam a, hei pawh Eizawnna bul tan tur te tana tangkai taka hman theih a nih avangin a pawimawh."

"State Sawrkar ngei pawhin an Policy nen kaihkawp tumin Hand Holding Policy ah kaihluh an tum niin a langa a lawmmawm rualin PM Schemes chu PM Schemes a nih anga tha taka lo thawhpui a, rem leh rem lova mahni Party hamthatna atana hman tum mai lo tur leh a chhawr tur dik tak Eizawnna bul tan turte tana awlsamna kawng lo zawn pui se State Sawrkar tan achievement ropui tak a ni ngei ang," a ti bawk.