Aizawl May 19, 2023 : Vawiin khan Mizoram Peoples Forum (MPF) chuan chanchinthar lakhawmtue an kawm a, MJA chungah te, Political Party te leh mipui te chungah lawmthu an sawi a, Inthlanpui lo awm turah heng mi te hnenah hian ngenna an siam puanchhuahna hun an hmang.

MPF chuan Political party te chu thawhhona thutling rinawm taka zawm theih turin party tinte an ngen a, sum leh therhlo hmanga vote lei tur te, an thawhhona thuthlung anga party policy leh manifesto te chu campaign nan hman ni se an ti a, dawt leh thu belhchian dawl lo leh finfiah nghal theih loh hmanga campain ni lo turin an ngen bawk.

"Party insawichhiat hi tih loh ni se. Sawrkar kal tawh leh kal mekten ram tan thil tha an tih tawh te hre theuh a. Thil tha tih engmah nei lo ang maia inchirhtheh hi a tha lo va. An thiltih chhunzawm tlakte chu chhunzawm zel hi a puitling zia zawk a ni" MPF chuan an ti.

MPF chuan Political party te chu Invau leh intihthaih lo turin an ngen a, Party tih turte leh hmathatna te anmahni vote lo te chang ve lo tur leh a vote-tute duhsak bik tur anga invauna leh intihthaihna te hi tha a ti loh thu an sawi. Hetiang zawnga campaign lo turin party tinte an ngen a, thlantlin te pawh sum leh nihna duh vanga inhralh lo turin an ngen a, a tul anga ruling leh opposition te chu thawkho thin turin an ngen bawk a ni. 

Mipuite pawh sum leh therhlo hmanga lei theiha awm lo turin MPF chuan a ngen a, an thawhhona thuthlung bawhchhia pawl te chuan ram dan leh inkaihhruaina, Kohhran leh khawtlangin inkaihhruaina te an ngaih pawimawh a rinawm loh an ti. Mi rinawm, dik leh tha ni-a hriat te huaisen taka thlang turin an ngen bawk.