ZALEN September 4, 2023 : Vawiin atang hian Thingsulthliah Joint Action Committee for School Upgradation leh Thingsulthliah Higher Secondary School Student Union hmalaknain Thingsulthliah, Thingsul -Tlangnuam leh Seling-ah te Adhoc grant-in-aid phutna leh sawrkar thu ngaihchan nan Flag dum an tar.

Flag tar hmaa inkhawm tawi neihah C.Lalruatkima, JAC Vice chairman-in kaihruaiin Thingsulthliah HSS Principal & Managing Board Secretary R. Lalfakawma’n thu a sawi a. Thusawi zawh hian kal khawm ten Adhoc ngiatin an au rual a, khaw chhung in tinah Flag dum tar a ni. Vawiin vek hian Joint Action Committee hruaitute Minister a theih ang ang hmu turin Aizawl an kal bawk.

Adhoc grant-in-aid ngiat hian Thingsulthliah khuaa All NGO & All Political party meeting chuan thuchhuah Joint Resolution an lo siam tawh a; zirlai nu leh pa kal khawmte pawhin Admission fee & Monthly fee an awl theih nan Adhoc ngiatna thuchhuah an lo siam tawh bawk a ni.

Kum 2004 a din Thingsulthliah Higher Secondary School-ah hian tun dinhmunah zirlai 155 an awm mek a, Subject 6 zirna hawn niin naupang an tam avangin loh theih loh avangin subject 5 ah zirtirtu double a ni a, naupangte pawh section-a then an ni. Zirtirtu 11 leh Office Assistant 1 awmin kum 2019 atang khan NIELIT Study Centre hawngin Computer zirna pawh zirtirtu thiam zirtirna hnuaiah changtlung taka kalpui a ni.