June 1, 2022: Controlling & Licensing Authority Directorate of Health Services, Mizoram chuan thisen chaw chi khat, Compound Sodium Lactate Injection (RL) tha tawk lo an hmuchhuak a, Swaroop Pharmaceutical Pvt. Ltd., Aligarh siam chu mipuite hmang lo turin thuchhuah an siam.  

Thuchhuah chuan, tunlai hian thisena thun chi damdawi chi khat - Compound Sodium Lactate Injection (RL), Swaroop Pharmaceutical Pvt. Ltd., Aligarh siam chu a hmangtu damlo ten harsatna an tawh phah niin an hriat thu an tarlang. He damdawi hi a quality enfiah turin Drugs Testing Laboratory-ah thawn a nih tawh thu leh a nihna dik tak hriat a nih hma chuan he Ringer Lactate (RL) hi hmang zawm tawh lo turin mipui te an ngen.

ZALEN in a biaknaah, Lalsawma, Controlling & Licensing Authority Directorate of Health Services, Mizoram chuan, he thisen chaw 'Ringer Lactate (RL)' khai te chuan khawsik sang tak an neih phah niin a sawi a, district hrang hrang leh private hospital atangin report an dawn thu a sawi.

Mizorama he damdawi Ringer Lactate, Mfd : Swaroop Pharmaceutical Pvt. Ltd. siam (Batch number tih bik awm lo, a awm apiang) chah luttu Wholesaler-te pawh he company siam an hralhchhuah te chu kokir tura hriattir an nih tawh thu leh company hi an hmelhriat ngai a nih loh tih, Lalsawma, Controlling & Licensing Authority Directorate of Health Services, Mizoram chuan ZALEN a hrilh bawk.

District hrang hranga hospital canteen leh private hospital-te pawh, he RL hi hmang lo tura ngen an ni tawh thu leh Damdawi zuar zingah kawl an awm a nih pawhin hralhchhuak tawh lo tura hriattir an nih tawh thu an thuchhuakah an tarlang bawk.