Aizawl : Hospital & Medical Education (HME), Govt. of Mizoram chuan a thlawna thisen (Free blood) dawn a nih theih nan a hmalakna kal mekah thil dik lo a awm lo thu leh a pangngaiin an kal reng tih Zalen chuan thu a dawng.

Tualchhung chanchinbu pakhatina blood processing fee lak a nih loh hnua Blook Bank leh hospital te thisen lak leh dawn kawngah harsatna nei nia an tarlan chu Hospital & Medical Education (HME), Govt. of Mizoram hotute chuan, “An chhuah hi a dik tawk lo,” tiin Zalen an hrilh.

HME chuan, “MNF sorkar tharin 2018-19 last quarter atan cheng nuai 50 a dah hmangin tunah hian Blood Bag leh a hmanrua dang lei fel a ni tawh a, Central Medical Store, Zemabawk-ah Vigilance Committee endik turin dah a ni. Heng hmanrua te hi Vigilance Committee-in a endik hnuah sem chhuah an ni ang. Kum 2019-20 atan Blood Bag leh a hmanraw dang lei nan cheng vaibelchhe 1 leh a chanve (Rs.1.5 crore) Sorkar in Budget ah a dah. Heng te hi lei chhunzawm zel tura ruahman a ni,” tiin an sawi bawk a ni.

“Sorkar kalphung pangngai zawm a, hmanrua lei dawn hian hun a duh thin a, chuvangin hospital hrang hrang mamawhte hi Medical Superintendent atangin lei thin a ni; chu chu ‘local purchase’ tih a ni. Blood Bank hian harsatna lian tham heng hmanrua leh bungrua awm loh vang hian an nei lo tih District Medical Superintendent te hnen atangin kan dawng. Indaih lohna a lo awm pawhin Blood Bank te hi an insiamrem/inphuhruk tawn thei reng a ni,” an ti.

Hriat tawh angin MNF sorkara Council of Ministers meeting chuan January 10, 2019 khan blood processing fee lak tawh loh a rel a, hman zui nghal a ni bawk. March 20, 2019 a Assembly budget session-ah khan Health Minister chuan 2019-20 chhunga blood processing fee atan Finance-ah cheng nuai 200 dil a nih thu a sawi. Mizoram sorkar budget ruahman - Demand for Grants (for vote on account) 2019-2020-ah chuan ‘Blood Transfusion’ tih a awm a, hetah hi chuan cheng nuai 150 chiah dah a ni thung.

Tunlai thisen thu leng

National AIDS Control Organisation chuan kum 2015 atang khan state hrang hrangte thisen sawngbawlna man a tumsak thin chu a titawp a. Mizoram sawrkar chuan BPL chhungkua leh RSBY-a in ziak lutte tiam lovin unit khat zelah thisen sawngbawlna atan Rs.550 a la.

MNF sawrkar, CM Zoramthanga kaihhruai chuan ni 10.1.2019 khan Mizoram chhunga recognized blood bank-a thisen dah khawl te chu a mamawhtu damlote hnenah a thlawn veka pek chhuah turin a rel a, hei hi hman nghal nise an ti bawk.

March 2019 a Assembly session ah Health Minister Dr. R. Lalthangliana chuan kum 2019-20 chhunga hman turin thisen sawngbawlna atan Finance Department ah cheng nuai 200 dil mek a nih thu a sawi.