Aizawl June 23, 2024 : Thla nga kalta, January atanga May 2024 chhung khan Aizawl khawpuiah lirthei chetsualna avangin mi 13 an thi a. Lirthei chetsualna thlen chhan ber hi a khalhtu fimkhur loh vang a ni.

ZALEN zawhna chhangin Aizawl City Traffic Police chuan thla nga kalta chhung khan Aizawl khawpui huam chhungah lirthei chetsualna tum 15 thlengin mi 13-in nunna an chân a, hliam pariat an awm bawk.

Traffic Police thawktute chuan January - May, 2024 chhung khan lirthei dan bawhchhia 3,965 man an ni a, heng zinga a tam ber hi two wheeler an ni a. Traffic Police-ten two wheeler dan bawhchhia an man zat hi 2,656 niin hei hi lirthei man zawng zawng atanga chhutin 67% a tling a ni.

LMV chu dan bawhchhia tam ber dawttu niin 956 man a ni a, HMV 167, Taxi 139, Bus 33, MMV 13 leh a dang pakhat te an ni.

Lirthei dan bawhchhia man zingah hian MV Rules bawhchhia an tam ber a, a hmun lova lirthei dah (no parking) leh wrong side te chu a tam zual an ni a. Lirthei dan bawhchhia atanga an sum chawitir tlingkhawm hi Rs. 27,38,402 a tling a ni.

Traffic Police ten thla 5 chhunga dan bawhchhia sum an chawitir dan

Thla   sum chawitir zat

January  - Rs. 5,81,802

February  - Rs. 6,04,400

March   - Rs. 5,37,000

April   - Rs. 4,65,200

May   - Rs. 5,50,000

Total   - Rs. 27,38,402