ZALEN, June 22, 2026: Lalrina Renthlei chuan thla hmasaa inelna final-a a hneh loh, Lalsangzela lakah phuba lain Mizoram 6 Red Snooker Championship 2026-2027-ah a champion.

Mizoram Snooker & Billiards Association (MSBA) buatsaih inelna hi Inrinni zan khan MSBA Hall, Hawla Indoor Stadium, Republic Vengthlangah final khelh niin Rina hian Sangzela lakah 6-4-in hnehna a chang.

May thla tawp khan Khatla South, Aizawl tlangval hian Mizoram 9 Ball Pool Championship 2026-27 final-ah Rina hi 8-2-a hnehin a lo champion tawh a. Tun tumah erawh Tuikhuahtlang tlangvalin phuba lain hnehna a chang ve ta thung ni.

Final hi race to 6-a khelh a ni ni a. Sangzela’n bul tan tha zawkin frame hmasa ber a la a; mahse, tlawm zawn tum lo Rina insiam remin a dawt frame thum la zawnin 3-1-in hma a hruai a. Awlsam taka tlawm tum bik lovin Sangzela’n a bei let a, frame 5-na leh 6-na la ve lehin a nihrual leh hman.

A dawt frame hnih chu Rina’n chang velehin 5-3-in a kal fal leh a, Sangzela’n a dawt frame lain 5-4-in hneh leh hman mah se frame 10-naah Rina a dang zo ta lo a ni.

Mizoram 6 Red Snooker Championship hi kar kal ta Thawhtanni atanga khelh tan kha niin Mizoram chhunga player tha thahnem tak an inlan a ni.