Aizawl : Zoram Medical College (ZMC)-a medical college bik enkawlna atana thla khata Mizoram sawrkar senso zat chu chawhrualin Rs. Nuai 438.22 a tling a. Hetihlai hian central sawrkarin ZMC a la anih chuan faculty tam zawk leh MBBS seat tam zawk hawn theih beisei a ni.

ZALEN-in RTI hmanga a zawhna, ZMC SPIO-in a chhan danin, ZMC-ah zirtirtu (teaching staff) 90 an awm mek a, non-teaching staff (doctor, nurse, administrative staff) 411 an awm a. ZMC-a medical college bik enkawlna atana thla khata Mizoram sawrkar senso zat chu (2018-19 atanga 2021-22 financial year tawp thlenga chawhrualin) Rs. Nuai 438.22 vel zel a ni.

Central sawrkarin ZMC enkawl ta se, state sawrkarin a enkawl aia a thatna zawk tur chungchangah SPIO chuan India ram hmun hrang hrang atanga faculty tam zawk lo kal thei tura beisei a nih thu leh MBBS seat tam zawk hawn theih tura beisei a nih thu a tar lang.

SPIO tar lan danin a tira a hming put, Mizoram Institute of Medical Education & Research (MIMER) tih, a hnua ZMC tia thlak a nih vangin ZMC-in sawrkar laipui leh hmun dang atanga tanpuina sum a hmuh tur ang hmuh loh a neih phah lo.

ZMC MBBS 1st batch (2018 batch)-ten nakum February 27- March 17-ah MBBS final part 2 an exam ang a, a pass-te chuan kum khat internship an tih hnuah doctor license an nei thei ang a. License nei turin ZMC-in National Medical Commission (NMC) atanga recognition a neih a ngai a, chumi tur chuan NMC-ah dilna thehluh tawh a ni.

ZMC-a doctor zir zingah Mizo 301 an awm mek a (1st batch-ah 74, 2nd batch-ah 77, 3rd batch-ah 79 leh 4th batch-ah 71), August 7, 2018-ah hawn niin, class tan a ni a. Medical college puitlinga pawm turin Medical Council of India/NMC-in vawi nga an endik tawh a, recognition hmu tura endik hmabak la niin, a hun tur NMC thu thu a ni.

September 24, 2022 khan Chief Minister Zoramthanga chuan thuthar thehdarhtute kawmin, sawrkar laipui hnena ZMC hlan tum a nih chhan chu sum leh pai chungchang bakah, medical college tha an duh vang a ni tih a sawi a. Sawrkar laipuiin a la a nih pawhin, seat awm zinga a zatve (50%) chu Mizoram tan hauh a nih thu a sawi.