Aizawl January 21, 2024 : Taxation Department chuan sawrkarin chhiah hmu tura an bituk Rs. 10,00,00,00,000 atangin Rs. 8,10,18,02,196 hmu tawhin thla kua chhungin an target atangin 81% an hmu tawh.

Taxation department hian thla kua kalta (April, 2023 - December, 2023) inkar chhung khan GST (Goods & Services Tax)-a chhiah hmu tura sawrkarin a bituk, Rs. 865,00,00,000 atangin Rs. 706,87,53,722 an hmu tawh a, Profession tax-a hmuh tura beisei, Rs. 15,00,00,000 atangin Rs. 11,95,60,630, State Sales Tax (VAT)-a hmuh tura beisei Rs. 120,00,00,000 atangin Rs. 91,33,15,764 leh thil dang atangin Rs. 1,52,080 an hmu tawh a. Sawrkarin chhiah hmu tura a beisei zat hi an khum ngei rin a ni.

ZALEN zawhna chhangin Taxation department thawktute chuan VAT hman lai aiin GST hman hnuah chhiah a lut tha zawk tih an sawi a. GST-ah hian sumdawngten return an file that avangin chhiah lut hi a pung niin an sawi bawk.

VAT (sales tax) hman lai kha chuan thil siam chhuaktu state-te an hlawk a; mahse, GST hman a nih hnuah chhiah lut hi sawrkar laipui leh state sawrkarten a zatve (50-50)-in an insem avangin Mizoram ang thawh chhuah nei tlem state chuan a hlawkpui niin an sawi bawk.