October ni 2 kha Mahatma piancham a nih avangin PM N. Modi an a lo tlangzarh tawh India pum tihfai runpui neih a ni a. Mizoram ah pawh hman niin Aizawl khawpuia Gandhi-a lim hrula kawngpui ah Sawrkar chuan hun a buatsaih a. He programme hawn a nih tum khan hmun phiah kengin ram pum huapa kawng dung te chu tihfai an ni tawh a ni. Gandhi-a piancham Aizawla hmannaah thil duhawm lo anga ngaih theih a thleng palha, bawlhlhlawh phiah fai tur kawngpuiah dah nia sawi a ni a, social media-ah a darh a, thlalak thlengin a darh mek a, ‘lemchang anga ngaihna’ mipuiah a awma, an thinrim inhrosakna chu social media ah bawk a leng nuai nuai a ni. Swatch Bharat thlangzarh a nih hman dan pawh kha rinhlelh a kai thei bawk. Lehlamah chuan Central Sawrkar Programme a nih angin he hun hi hman a ngaia, han phiah fai mai tur a awm loh vangin dahchawp a ni thei a ni, he programme hi Mizoram sawrkarin a thlawp a ni tih lanna a ni thei a; entirnaah (example/sample) bawlhlhlawh te chu an dah chawp ta mai a ni tiin ngaihdana awm thei bawk e. A enga pawh chu nise indona hi khawiah pawh a inrawlh thei a; Nehru-a te chhungkua leh Gandhi-a te kha inzawm tlatin mipuiin an hmu a; tunhnai deuh khan ‘Nehru a thlah kal zelte’n Sawrkar Scheme lianthamah Gandhi-a hming an ti lang mang loa, an mahni hming an vuah zel,’ tih thehdarh a ni a, BJP in ‘Nehru family ‘ atanga Mahatma laksak a, an mahni inbel tumna niin thenkhat chuan an sawi . A enga pawh chu nise he programme in a tum chu bawlhhlawh a awmna hmun tura paiha khawpui/khua thianghlim leh fai a awm theih na tura theihtawp chhuah a ni a, thil tha tak a ni a chhunzawm zel turah ngaiu ila. Bawlhhlawh dahchawp hi tih loh a nih dawn chuan khawpui hmun langsar fai zia a entir zawk tih hi hlado tling a ni a, ramhruaitute pawhin bawlhlawh a awm loh thu chu puang zarin khawpui fai zia tilangtu a nih thu an sawi chamchi zawk tur a ni ang. Media mit atanga thlir chuan a bikin chanchinbu-ah a lem tar turah phei chuan nalh, hmuh hahdam, thuchah nei kher kher thlalatu chuan a tum ber a ni a, thlalak pakhatin thu sang tam a sawi an tih thin kha. Phai chanchinbu leh ramchangkang chanchinbu-ah hetiang hi an rilru a nih avangin thlalak lo lang zinga thenkhatte chu a latuin a laksaka te a vawi khatah a duhtawk pui mai lo fo a, an tih nawn tir fo a, thenkhat chuan pawisa te pawh an pe thial thin. Media kalhmang hriat dawn chuan rilru zau put a ngai a, Mizo society chuan a tlin hrih lo thei. 2004 inthlan hlima CM lakluh tum Eptu lamin tihbuai an tum tum khan phai media an lo chho nasa a, tualchhung journalist te’n an kaihhruai a, chutah pawh chuan thla an lak chu an duh ang a nih loh chuan an tih nawn tira, a duhlo chu an chhuah sak lo mai thin a. Hei hi thil siamchawp lam nilovin mipui zahna avanga hmuhnuam thlalak tha an zawnna a ni thin zawk a, mi thil ti lai (che lai) an hmeh fuh loh pawhin an nawn fo tir nachhan chu a ni. Mizoram journalist te pawhin ‘thlalak tha’ an duh ve tawh a, thusawi thei nia an ngaih ‘subject’ te phei chu an laknawn sak fo a, an duh ang a nih mai loh chuan inherrem tur te pawhin an ngen thin tawh zawk. ‘Tifai’ tih hian a lang chin tihfai chauh a kawk lo a, hmun tawp, hmun kil khawr bawlhhlawh tumna veng/hmun te pawh a huam a ni. Hun lo awm zel turah pawh Sawrkar lam hian tui luan kawr tawp lutuk leh khawchhunga hmun tawp lai bik atangin hma la zawk sela; tunhma leh tunhnua hmalakna te chu media hmangin tidarh sela hma kan sawn a beisei awm. Hetiang han ngaihtuah mai pawhin bul tanna tur hmun a mitthla theih mai a, hmun langsar bawlhhlawh tamna hmun te hian khawpui chhunga chengte-ah natna a thlen thei a. Chutiang hmuna hma an lak pawhin media an thawhpui tur a ni a. Langthei lo rilru thlengin he hnam hian ‘tihfai’ zir zel rawh se.