September 5, 2023; Mizoram a Vantlang thlanmual, thlan chhawrdawh hmasa berah ruang 6 zalh an ni tawh.

ZALEN thudawn danin, thlan chhawrdawh hi Chaltlang Branch YMA hmalakna a, an veng thlanmual hmuna an siam niin, ruahmanna fel tak a siam a nih avangin harsatna tawh an la nei lo.

Khawpui a cheng kan pung zel a, mitthi kan pun belh zel bawk a, ram a thang ve silo. Ruahsur ah thlanmual min te a awm thin bawk.

Heng zawng zawng avang hian mitthi inphum dan kalphungah te ngaihtuahna thar kan neih a pawimawh chho telh telh dawn niin a lang.

Chaltlang thlan chhawrdawh hi Chaltlang YMA hmalakna in UD&PA hnuaia sum hmuh hmanga sak niin, 24.1.2019 khan a hmun laih tan niin, 26.10.2019 khan peihfel a ni a. Chhawng tinah thlan 27 dah niin, chhawng 5 a awm a. A vaiin thlan 135 a awm a ni.

A chhak siam belhah thlan 28 a awm bawk a, a vaiin thlan 163 a awm a ni. He thlan chhawrdawh hi a dung 80 ft. niin a vang hi 16 ft. a ni a. A hnuaia thlan siamna chin hi a dung 70ft. leh a vang 8 ft. a ni.

A hnuaiah hian 3x3ft a zau leh thuk drain tur laih khuar a ni a, he khurah hian lei me chhungkhatin mitthi atanga tui lo chhuak lo hip kang thei tura ngaih a ni a. Thlan zawng zawng hi a mal malin pipe hmanga drain ah zawmluh vek a ni a, mitthi atanga tui lo chhuak te drain ah a luh vek theih nan slab hi a hnung lamah a awiha chhun vek a ni.

Thlan chhawrdawh siamna tura estimated amount chu Rs. 29,73,000 a ni a. YMA chhiatni thatni fund atangin cheng nuai thum hman tel a ni bawk.