MJA Lunglei district President H.Lal-thansanga chuan Zir -tawpni khan Art & Culture Auditorium, Lunglei-ah H. Laldinmawia, Zohnuai (Lushai Soap Industry) siam thleng silna (dish wash) a tlangzarh. Thu sawiin MJA district President H. Lalthan-sanga chuan Lunglei tlangvalin a ma kutkawih ngei hmanga inbualna sahbawn a siam tawh hnuah thleng silna sahbawn (Dish Wash) a siam chhuak leh tlangzarh a ni thei chu lawm-awm a tih thu a sawi a. “Mizo siam ngei thil hi kan ngaihhlut a, keimahni Mizote ngei hian kan hman uar a tul a, kan khawtualah sum tuallenga siam tam a, economic dinhmun tha zawk-ah min awmtir theitu a ni a, phai lam atanga thil siam ringawt lei leh hman ai chuan Mizo siam, kan khawtual mi ngei siam kan hman hian kan ram leh khawtlang tan pawh a sawtpui zawk a ni,” a ti. Khuallian chuan, “Mizo thalai mahni kutkawih hmanga eizawn tum leh hmalatu kan nei chho zel hi hmasawnna lawmawm tak a ni a, ngaihsan tur dik kan ngaihsan a, sum hmanna tur dik taka kan hman thiam a tul a ni,” a ti bawk. He hunah hian H.Laldinmawia, proprietor Lushai Soap chuan lawmthu a sawi bakah kalkhawm atangin mi hrang hrangin thu an sawi a, kal khawmte Vanrammawii Pautu chuan zaiin a awi bawk a ni. H.Laldinmawia, Prop. Lushai Soap hian Zohnuai Lungleiah Lushai Soap Industry hi 11th Sept. 2015 khan a din a, sahbawn siam hi CSDP, N. Delhi-ah a lo zuk zir tawh a ni. A thilsiam thleng silna sahbawn hi 500ml bottle niin Rs 100/- man tur a nih laiin tlangzarhna hmunah hian Rs 70/- a hralh chhuah a ni a, kalkhawmten an ken zawng zawng an lei zawhsak nghal vek a ni.