Aizawl: MPCC chuan thuchhuah siamin Chief Minister Zoramthanga chu thu belh-chiandawl chauh sawi tawh turin an phut tih an tarlang.
Nimina thuchhuah an siamah MPCC chuan February 21, 2019 (Ningani) a Synod Executive Committee member-te leh MLA tling tharte inkawmnaah Chief Minister in Lengpui airport runway a rei tawh lutuk vanga thlawhtheihnate an thlawk tha duh lo ni a sawi chu thu belhchiandawllo niin an sawi a.
Lengpui a service thin Jet Airways-in Mizoram mai bakah North East khawpui dang, Silchar, Jorhat leh Imphal-a service an tihtawp nachhan hi media hrang hrang report-ah chuan sum leh paia Jet Airways Company nasa taka a tlakchhiat vang ti a report a ni, an ti.
India ramah hian BJP sorkar hnuaia Aviation Turbine Fuel (AFT) man to chak lutuk leh hnathawkte hlawh sang lutuk kara customer hip nana thlawhna chuan man intih tlawm siak ngai bawk si hi thlawhna company-te hian an tuar nasa hle tih hi media lamin an puanzar zawk chu a ni, tiin an thuchhuah hian an tarlang bawk.