China ram khawpui pakhat Wuhan atanga intan natna chi khar Corona virus (Covid-19) avangin khawvel a buai a. He natna avang hian mi sang tel an thi tawha ni. A rapthlak a, he natna laka invenna pawh khawvel mithiam ten an la hmu chhuak thei lo. Khawvel ram ropui leh thiltithai ber America meuh pawh a talbuaia, emergency hial a puang ta. India ram pawh he natna lakah hian a bang bik lo a, a vei mi engemaw zat hmuhchhuah an ni tawh a, thi pawh an awm ta nual mai. Eng angin nge he natna hi a darh zel ang tih hriat a ni lo a, chutih kara thil lawmawm deuh mai chu he natna hian hriattheih chinah Mizoram a la rawn lut lo a,thil lawmawm tak ni mahse eng chen nge kan fihlim ang hriat a ni lo.

Hetia mipui kan buai a, khawvel pawh a rum mek lai leh Mizoram ngeiah pawhkan thlabar em em laia thu diklo vawrhdarh a awm thin hi a pawi tak zet a ni. Social media, a bikin whatsapp lamah te he hri kai an awm thu te, Chief Secretary hminga thuchhuah lem siam a ni te hi a ngeiawm a, hei hian mipui a ti ralkhel lehzual. Heng thu diklo kan thehdarh avang hian tul lovah mipui kan ti chiai a, chumai ni lovin hrem theih a ni tih kan hriatchian a pawimawh hle mai.

Thil lawmawm tak erawh chu heng thu diklo thehdarhtu te dan leh thupek kengkawhtu Police ten chhuichhuak a, an man thei zel hi a ni. Hemi kawnga Mizoram Police te inpekna leh thawhrimna hi a fakawm tak zet a ni. Thu diklo vawrhdarhtu te hian an thiltih a pawizia hi an hriatthar leh a tha a. An thiltihavang hian case siamsak an ni a, jail bang hian zut theihna anih piah lamah tunhnu zelah pawh Police case nei te chuan hna zawn kawngah harsatna an nei theia ni tih hriat a tha hle mai.

Hetih mek lai hian mipuite pawh engemaw hlekah kan chiai hma lutuk ve bawkniin a lang. Khawi whatsapp group ah emaw thil post a awmin finfiah hmasa lovin kan ring mai zel niin a lang. Tunlai kan buaipui Covid-19 natna chungchangah pawh sawrkarin thu puangtu tur a ruat a, anni hnen atanga thuchhuak ni lo hi chuawih lo phawt a him. Covid-19 hian eng tik ah nge Mizoram a lo thlen ang hriat ani lo a, chiai buai mai lova fimkhur taka lo hmachhawn chi zawk a ni e.