- Rev. Lalhmuchhuaka

Ladies First tih tawngkam lâr tak hi ziakin ka’n Pachuau sual ve chawt mai teh ang. A chhiartute tân a tak chan tûr alawi awm lo, Vazûn puah ang mai a nih pawhin, hloh hlêpah an chhiar thiam tho ang.

A chêpakai

Ladies first tih tawngkam upa tak hi hma khawsânga German râl lian tûr pawh an la awm hma, pûka an chên hun laia (ancient age) an lo hman daih tawh niin an sawi. Chûng hun lai chuan: ‘An chênna pûk pâwn lamah thâwm eng pawh awm se, an hmeichhiaten beng chhia mit lênin, eng nge ni tih ngaichâng tûrin an chhuak hmasa a. An hnungah mipain hriamhrei nên inrâlring sa râna zuiin, a hmaa kal hmeichhia kha lo khawih emaw, lo beih tumtu emaw chu, ramsa a ni emaw, râl pawh ni se, mipa khân a rawn tukdawl (cover)thei dâwn a ni,’ tihna a ni âwm e. Thangkûra tawngkam takin, “Hmeichhe phên leh mipa phên a inang reng,” an tih vena a ni emaw ka hre lo.

Hun laihâwlah (middle age) khân pasalthate (knights) chuan an kawrfual chu hlîpin, chirh leh diak nâlah hmeichhiate sa him nân an phah thlawp a, a chungah hmeichhiate chu him takin an kaltîr thîn, an ti. Hei hi thupuia kan hman, ‘ladies first’ hawi lam, a awmzia chu a ni, tiin an sawi leh zêl a ni. 

Thawnthu pakhatah chuan, Italy ramah nula leh tlangvâl inhmangaih êm êm hi an awm a. An khawtlâng leh hnam dân avângin innei thei an ni lo. Pialrâlah chatuana an chên dun thuai theih nân, tuipuiah zuang thlaa intihhlum an tum ta a. Mipa chuan a hmangaih leh duh ber tâna nun hlan hmasak thlangin, tuipuiah chuan a zuangthla ta a. Nula chuan a rilru thlâk thutin inah a hawsan leh si a ni âwm e. He thil thleng avâng hian mipain an sahim nân, ‘ladies first’ tih hi an ar tial fin thu hla a ni e, an ti! Ka awih lo.

Kan thupui sawi fiahna hnahchawi ti tamah, Titanic lawng lianin chhiatna râpthlâk tak a tawh tuma chanchin ngaihnawm tak kha sawi tel ang aw. Kha mi tuma an chhanhim zât chu: hmeichhia (puitling) 74% leh naupang 54% an nih laiin, mipa (puitling) chu 20% chauh an ni, an ti. Chuvângin, ladies first chauh pawh ni lovin, women and children first tih thufing tawi te pawh an hmang ta zêl niin an sawi.

He thufing tawi hi

Hmeichhe zahna leh chawimawina tawngkam hawihhâwm, khawilo nih chânga dâwrah emaw, mi inah emaw luh dâwn te, kawng zîm leh chêp deuha kal a ngaih chânga, “Nang kal hmasa rawh,”tia mipain duhsakna lantîra an kal hmasaktîr te, hmeichhia an nih vânga mipain ngaihsakna (a tha lam zâwng) a lantîr ang chi rêng rêng hi, kan thupui sawi tum leh a awmzia chu a ni, tiin sawi ila. A buk thelhin kan thelh lo tûrah ngai ang. ‘Hmeichhe âwm nêm zâwk an nia,’ tia mipain eng thilah pawh ngaihhnathiamna (special caring) kan neih ang chîte pawh hi, he thufing tawi awmzia leh hawi lam chu ni berin a lang.

Thupui leh Mizote inlaichînna:

Chanchin Tha ênga kan mit a keu hma hauha kan pi pute’n,‘Tawngkam thain sial a man,’ tih thufing tawi an hman thin kha a lo Pathian thu hle mai. Kha tih hun lai khân hmeichhe fa an lo pianin, “Nula hmel tha, sial man tûr a nih hi,” tiin nau entute’n duhsakna tawngkam mawi leh zahawm, hawihhâwm tak hmangin, a hun laia Mizo rohlu ber ‘sial’ tawng chhanin, lawmpuina tawngkamin mal an sâwm thîn.