Aizawl Municipal Council huaihawtin Veng fai ber thlan a ni tawh a, Faina Hapta pawh khar a ni tawh a ni. Hapta zo tawh mah se Veng leh a chhehvel vawnfai zel a tulzia chanchinbu lamah te thai lan a ni a. Veng thenkhat chuan beihpui an la thlak dawn chauha a lawmawm hle a ni. Kumin fai endik chungchangah khan Pahnihna latu Republic Vengthlangah chuan hnatlang an neih zin thu te; bawhlawh bawm khawlaiah an chhawp chhuah that thute leh fai inzirtirna thu ziak hmun langsar 30 dawnah tar/ziah a nih thute endiktute lamin an sawi tawh a. Veng lian lemlova khawlai vawng fai tura heti zat inzirtirna tarlan a ni hian Veng chhung a al hneh viauin a rinawma, hmun dangah pawh chin zel tlak niin a lang. Veng dang tan pawh Veng neituin an huam chhung an vawn fai chuan inthlahrunnna neiin an tih balh sak ngawt a rinawm lem loh. Fai hi inzirtir chi a ni a, mihring tam zawkin chet fai hi an pianpui ngawt thei lova inzirtira than hnan chi a ni a, sikul, college, Sunday sikul, Kohhran, khawtlang leh dawhsan kan neih ang angah te tawp lova zirtirna neih fo chi a ni a; upa zawkte pawhin naupang zawk entawn atan nunpui sela a tha ngawt ang. Chuti a nih loh chuan than hnan theih ngaihna a awm lo a ni. Veng/khaw fai sawi hian bawlhhlawh tling khawm tihfai hi Mizo rilruah a la awm deuh niin a lang a, then fai rualin tih bawlhhlawh loh inzirtir tam a pawimawh hle. Tifaitu an awm a nih pawhin tibaltu an awm zel chuan a sawngsawhlawt rei lo ang. Puipunna hmunah meizial zuk khap a ni tawh a, Anti-Tobacco Squad ten an duh hmun an thawng thin a, media lamah tarlan a ni fo thin. Khawlai tibaltute pawh hi dan in a phut angin mana chawitir thak thak ni thin tawh sela; chutiang thil a thleng a nih chuan media pawhin puanzar an inhuam a rinawm hle a ni. Mi ramah chuan an khawpui tibaltute chu khauh takin an man tih kan sawi fo a, a taka kan tih ve a hun tawh a ni ang e. Khawpui/khua vawng fai tura inzirtirna thuziak hi khawlaiah hmuh tur a tam lo hle a; tun ai hian tan lak theih niin a lang a ni. Hmun hulum leh langsar laiah a bikin dah tam nisela, beihpui thlak tak tak a ngai niin a hriat a. Fai leh Mizote sakhaw vawn hian inhmehnaa nei tam hle a; chumi hmang chuan ‘slogan’ tar a ni thin a, zep nak emaw mi rilruah a thawk vak tawh lo nia a lan chang a awm rum rum ta fo mai. Hei ai chuan thu khauh deuh khawpui vawng fai tura inkarna te; midang tifaitu an awm chuan lohzia te leh mawhphurhna lak inzirtir lam hawi zawnga tih dan thlak a hun a ni tawh hle mai. Heng inzirtirna te hian khawpui/khua tam hneh hrim hrim sela, kan hmuh zin na na na chuan zawm hun a la awm chek ang. I chenna hmun vawngfai rawh; i mawh a ni miau a.