Ka phelh phung thin. Kâr hmasa Zalên chhuaka ‘Buannel ram dai’ thû ka ziak—dik lo baksaka a hla thû ka dahte kha ka hre reng mai—rilrûin. A nuam ka tizân bîk lo; a ni mai lo—hrehawm ka ti khawp.

Pu CH. Malsâwma fapa Henry-a nên pawh kan inbe chiam mai; ngaihdam ka dîl chiam ringawt mai. Tin, a lâwm thûte pawh phone kaltlangin a rawn chham chiam mai—min ngai damin ka tihsualah min theihnghilh a; ka lâwm hlê.

Ka nihna takah chuan, kei hi—tihpheng phung chîng mi hi ka ni roh bawk hrim hrim a. Min ngaidam te’u! Khâ ka thuziak kha ka edit vek emaw ka lo intipek a; a lo ni lo nasâ! Ka edit zâwka kha Pu Vanneihtluanga (Editor, Lêngzêm) ka lo thawn pek zu lo niin! Ka la edit loh zâwka kha ka rawn ‘zalên’ theh hluai ta si a—a pawi ta vak a nih kha!

WhatsApp leh Facebook lamah te a’n ‘viral’ zui leh ta khanglang a—keini akâra thuziak ve te—a’n ‘darh’ a nih chu—zahthlâk zâwkin. Dik taka sawi chuan, a ni alâwm—ka thiam lo hul hual a—kha thilah khan—ka zak!

Tin, kha hlâ khan (a phênah) thawnthu thui deuh a lo nei reng a—a fapa min hrilh chu! Mahse, hre duh chuan, ka tih kha, ka inah min rawn lèn chilh mai r’u—ka tih kha!

Tin, lehpek No. 2-na a ni ang chu—‘tihsual pheng-phung’ hi mihring dân rêng a ni, tih min hriat thiampui t’u. Tisual thiam lo hi Pathian hian zu siam thiam lo a… ka ti ve tlat a! Tisual pheng phunng ila, inkai harh leh nachâng hriat ‘nachâng’ hriat hi a finthlâk zâwk fo… ka ti fo.

A nihna takah chuan, tunge thil tisual loa piang tawh rêng awm le. Tunge, ‘I’m perfect man,’ inti tawh ngai a? Tunge, ‘Ka tha ber e,’ inti ngai awm tawha piang le? Kan inena, kan inteh a, kan inkhing pawh a ni thei e. Tumah hi kan inteh tling zo ngai lo a; keimahni mit hmuhah meuh pawha kan tlin loh chuan LALPA mit hmuhah phei chuan… tiraw?

’Tian tisual pheng phung mah ila, ngaidamtu Pathian kan nei miau a; chu chu kan ring a—tin, kan rinna siamtuah kan ngai a; kan pawm thlap. Nang ve le? I rinna chu hetah nge khitah le?
KHIMI khi chuan tisual pheng phung thin hi min ngaidam duh zêl nia—A hnên kan thlen hma loh chuan!