Aizawl khawpuiah nitin lirthei a pung chak hle a, kan kawngpui tihlen dan a awm bawk si loh avang leh lirthei te kawngsirah kan hun loh theihloh bawk si avangin kawng a chep a, ruahman angin hun a hman theih loh a. Kan tawngkam hman lar ber zinga mi leh chhuanlam atana kan hman nasat em em chu ‘traffic jam’ tih hi a ni. Aizawl traffic jam tihziaawm nan ruahmanna thar eng emaw zat siam a ni tawh a, tun hnai khan CM Zoramthanga chuan ruahmanna thar Parking House Support Scheme (PAHOSS) chu a tlangzarh a, traffic tawt a tiziaawm dawn em tih chu hunin a hril turah ngai ang.

Parking House Support Scheme (PAHOSS) hi UD&PA Department hnuaia kalpui tur a niin sawrkarin car pakhat din theihna (2.5x4.5 m a zau) zelah tanpuina (grant in aid) nuai 1 zel a pe dawn a, he tanpuina dawng thei tur chuan a tlem berah car 5 tal dah theihna a ni a, two wheeler a nih chuan 6 zel kha car pakhat anga chhut tur a ni. He scheme dawngtute hian a thlawnin sum hi an dawng dawn a, sawrkar nen MoU ziakin a lo berah kum 10 chhung tal public parking-ah hian an hman a tul dawn a, sum lut erawh a neitu ten an hui vek ang.

Parking House Support Scheme (PAHOSS) hi February 6, 2019 khan Chief Minister chuan Chief Minister’s Conference Hall-ah a tlangzarh a, a thawhkhatna atan June ni 13,2019 khan Chief Minister chuan Vanapa hall-ah PAHOSS hmanga in sa mi 99-te hnenah tanpuina sum hi a hlan a, a vaia hemi nia sum sem hi nuai 1746 a niin UDPA department chuan hemi atan hian dilna 563 an dawng tawh a, chung zinga 338 chu a hmunah enfiah tawh a ni. PAHOSS tanpuina dil thei te chu ram ruak public/commercial parking sa thar tur te, building awm sa parking atana let duh te tan a ni.

Zalen zawhna chhangin UD&PA Secretary Dr. C.Vanlalramsanga chuan PAHOSS chu kalpui chhunzawm char char an tum tih a sawi a. “Phase hmasa ah hian tlangdung kawng bakah Ramhlun North & South, Electric veng, Dinthar leh hmun pawimawh zual laite kan thlur deuh bik a. 1st phase-ah hian lirthei 1746 hunna tur siam theih a ni dawn a ni,” a ti. PAHOSS dawngtute hnena sum hlannaah CM chuan sawrkarin sum tam tak senga ram/hmun lei hnua sak leh chu thil buaithlak anih avangin mi mal garage sa theite tanpui chu thil hlawk zawk nia a hriat avangin PAHOSS hi a kalpui niin a sawi bawk.

Transport department chhut danin thla tin lirthei 1628.5 ziahluh thin ang a ni a, Aizawl district-ah lirthei 123,235 a awm a, heng zinga 70% chu khawpui chhunga tlan anga chhut a ni.