Tunhma chuan Mizote hi sipai ah kan tang nasa hle a, hmarchhak state zingah chuan a mipui ngaihtuahin sipai tang hnem ber kan ni hial awm e. Mahse tunhnai kum engemaw atang khan sipai tang hi kan tlem a, a bikin officer-a lut phei chu kan tlem lehzual a ni.

Tunhnaiah erawh sawrkar leh tlawmngai pawlte hmalaknain sipai tang kan pung chho leh ta. Hmarchhak state ah chuan Manipur state chu sipai chi hrang hrang Army, Navy leh Airforce tang tamna ber nia hriat a ni.

Sipai bângte hamthatna ngaihtuahtu atana sawrkarin department a din, Sainik Welfare & Resettlement office chuan tunhnaia sipai lut thar hi a zat hre chiah lo mahse kumtin an pung chho hret hret nia an hriat thu an sawi a. General duty-ah chuan Mizoram quota hnawh khah zel a ni tih an sawi. Tun hnaia mi thenkhat sipaia an tlin loh chhan chu a hmaa educational qualification pawl 8 ni thin chu pawl 10-ah tihsan a nih avang leh written test-ah CBSE pattern anga zawhna siam a nih vang niin an sawi a, Mizoramah chuan Mizoram Board of School Education syllabus kan zir avangin mi thenkhatin harsatna an tawk nia an hriat thu kan palai an hrilh.

Physical-a mi tam tak an tlak chhan pawh hun rei tak tak an nghah a ngaih avangin mi thenkhat chu an riltamin an chau thin niin an sawi a. Physical atan tlanah a ruala mi tam tak tlantir an nihin inpalthlu an tam thin a, hei hian harsatna a siam nia sawiin sipai latute hnenah hun thawl zawk siamsak turin an ngen tih an sawi.

Mizoram Youth Commission-in sipai lak kawnga a thawhpui Venghlui a inbun, Eastern Solutions & Consultancy Services chuan tunhma aiin thalaiten hna ruak chi hrang hrang leh sipai pawh an bawh nasa zawk tih kan palai an hrilh.

Sipai lak tur leh thil dangah te coaching an pe thin tih sawiin ni danga thalaite hnufumna written-ah coaching kal te chu an ziaawm niin an sawi a, kaihruaitu an awm that chuan tling pawh an tam niin an sawi. Medical-a tla an tam chhan chu zuk leh hmuama insum loh avang leh faina kawng hnufum vangte a ni fo tih sawiin sipai tang zingah Aizawl aiin thingtlang lam an tam zawk nia an hriat thu an sawi bawk.