Sawrkar laipui chuan India rama khawpui thlan chhuah bik 100-te chu kawng hrang hranga tihhmasawnna tur leh chei bik turin a thlang a, chung khawpui thlan chhuahte chu smart city tih an niin a tira khawpui thlan chhuah 100 zingah khawpui pahnihte an inhnuhdawh leh tak avangin khawpui 98-te chu Ministry of Housing & Urban Affairs hnuaiah Smart Cities Mission vuahin hmalak a ni.

Smart Cities Mission hnuaiah hian khawpui te hian inelna kalpui lehin a thawh khatna atan khawpui titha (challenge) 20-te chuan he hamthatna sum hmang hian an khawpui chei a ni a. Smart city-a thlan zingah hian Aizawl pawh tel vein thawh khatna leh thawh hnihnaah hian thlan a ni lo a, nikum June 25, 2018 khan 3rd Round zinga tel ve turin Aizawl chu Smart City tura thlan a ni.

Smart City hi kum 5 chhung 2015-2020 chhunga thawh tur a niin a tum ber chu khawpuia cheng mipuite hnena changtlung zawka tui, eng, tui luankawr tha, traffic, inkalpawhna, motor parking, in sak dan felfai, sumdawnna hmun tha siam, bawlh-hlawh senghawi, hriselna leh zirna tha nei tura hmalak te a ni.

He ruahmanna tihlawhtling tur hian Chief Secretary kaihhruaina hnuaiah State Level High Powered Committee din a ni a. Aizawl Smart City Limited (ASCL) Board of Directors din leh niin hei hi Secretary UD&PA-in a kaihhruai a ni.

Smart city-a Aizawl khawpui thlan a nih hnuah June 25, 2019 khan hnathawk tan tura hawn (kickoff) a ni a, Project Managment Consultant atan APCOS Pvt Ltd. chu thlan an niin scheme pahnih, Supply of Pelican Crossing System leh Supply of Traffic Bollards te thawh tan a ni tawh a, a dang pawh hi DPR siam mek niin chhunzawm zel tum a ni.

Zalen palaiin a biaknaah UD&PA Secretary Dr. C.Vanlal -ramsanga chuan, “Smart city mission hi kum 2020 thleng tur tih ni mah se Aizawl khawpui chuan hna kan tan dawn chauh avangin an pawtsei turah kan ngai a. Sawrkar laipui atanga sum min pek tur hi vaibelchhe 500 ni mah se convergence-te nen chuan a tam hle dawn a ni,” a ti.

100 Smart Cities Mission hi Prime Minister Narendra Modi chuan June 25, 2015 khan bul a tan (launch) a, he mission atan hian sawrkar laipui chuan vaibelchhe 98,000 a ruahman a ni.