Kum li vel phalna neia zu zawrh a nih hnuah tunhnai atang khan a zuar thin te hun pawh a tawp zui tawh, Mizoram Liquor Prohibition Act 2019 chu hman zui nghal a ni bawk. Zu dawr nei te dawr hawn an phal chhung hi May 27, 2019 thleng a ni chung khan April thla chanve atang kha chuan zu dawr (wine shop) te chuan zawrh tur mumal an nei tawh lo a, May-ah dawr hi khar a ni deuh vek tawh, zawrh tur an nei tawh loh vang a ni ber.

Zu dawrah hun engemaw chhung zu la tura kal mai tawh thin khan tunah chuan pan mai tur an nei tawh lo a, Aizawl leh a chhevel bakah thing tlang lam pawhin zawrh chhan tur leh in tura an lakna hmun ber Rangvamual leh Phunchawng lamah pawh zu lak tur a vang zui ve leh zel, niin ZALEN chuan thu a dawng. Zu hi lak tur a awm lo chu a ni lo a, sum neih dan a zirin a sen chi pawh lak tur a awm reng tho a, a manah erawh insen ve fe zel a ngai.

ZALEN thundawnna chuan, "RV lamah pawh a hun a zirin zu lei tur hmuh loh chang a awm fo ta mai. Pathianni ah phei chuan a zawng leh a zawng hi kan inpel suau suau a, Phunchawng pawh zuk thleng ila zawn fe a ngai tawh. Kan hmu a nih pawhin a that leh that loh lam pawh kan chhin tawh lo a, chhin hman pawh a ni lo, hmanhmawh takin kan inpe a, hmanhmawh tak bawkin tlan vang vang nghal zel a ngai,” tiin a sawi. Rangvamual leh Phunchawngah Pathianni hian YMA chuan zu zawrhchhuah an khap hrim hrim bawk a, ni dangah chuan an duty ngai lem lo thung.

'A sen chi' kan tih mai, India Made Foreign Liquor (IMFL) ram pawn atanga lakluh phal a nih chinah hun engemaw chhung chu wine shop a lun viau a, mahse, lakluhna lam a tawp chinah a daih rei thei lo, hei vang hian tualchhung siam zu lamah bawk zu in mi te an kir. Rangvamual leh Phunchawng lama a siamna hmun lamah pawh duh khawp nei turin mihring an indaih lo, niin he hmuna zu zuar te chuan an sawi a, hralh tur lak tur pawh a vang hle, niin an sawi a, a khaptu lam tha a tha ve zel bawk nen, zu hi a vang chho ta viau niin a lang.

Zu khap tura hmalak a nih chhoh lai, wine shop pawh khar a nih hma hauh atang khan Rangvamual-ah Excise Department te chuan out-post an hawng a, hei vang hian helai hmunah hian zu pawh a tawmim nghal a, state dang atanga zu lakluh tihtawp a nih chinah zu man tlawm lam a van zui avangin helai hmun hi a lehlam kawngah chuan a lun leh zui a, mahse, zu a van miau avangin zu a to lo thei lo. Wine shop tluang pangngaia hawn a nih laia zu fun khat cheng 25 man te chu cheng 50-ah a kai chho a, a man hi a to satliah mai a ni lo a, a zu funna sarang an tih tet zui bawk a vangin local tia an sawi mai tualchhung zu man hi a let hnihin a pung pawh a tih theih.

Hetihlai hian 'A sen chi' hi lei tur erawh a la awm reng tho niin a lang a, mahse, a man erawh a to. Mizoram chhunga zawrh tura lakluh lo dahkhawl tam tak an awm tih a lang a, chutihrualin Assam lam zu pawh hmuh tur a awm leh nual tawh a nih hmel. "Wine shop hawn a nih laia Rs. 300 man bawr vel ho kha tunah chuan Rs. 1200 chung lam a ni deuh vek tawh a, Rs. 500 bawr ho vel kha chu Rs. 1500 chunglam a ni deuh zel tawh," tiin ZALEN thudawnna chuan a sawi a, "Hriat chian loh chu an pe tha duh lo," a la ti zui.