Australian lam chhuak daih, mingo lehnghal, rapper lar chak tak, tunah pawh Justin Bieber nena an hla, ‘Stay’-in Billboard Hot 100 chart-a No. 2 ni thei, The Kid Laroi tia rimawi khawvela hriat hi Charlton Kenneth Jeffrey Howard tih hming puin August 17, 2003 khan Waterloo, New South Wales-ah a piang a, a pianna hi Sydney khawpui laili, Redfern bul mai a ni.

    Rimawi lamah hian nu leh pa chhun tur a nei tha a, naupang tê a nih laiin a nu hian Fugees, Erykah Badu leh Tupac Shakur hla hmangin a awi nasa thin hle.

    A pa, Nick Howard hi music producer niin sound engineer a ni bawk a. Australian star lar tak tak, Bardot leh Delta Goodrem te pawh lo thawhpui tawhtu a ni a. A nu, Sloane Howard pawh hi manager tha tak niin record label a din a, music executive niin tun hma lam chuan Popstars winner, Scott Cain pawh a lo kaihhruai tawh a ni.

    Rimawi lama chhun tur leh hnungzui tur a nei tha bawk a, a tuipui hle a. Hriat a hlawh tanna tak chu American rapper Juice Wrld-a’n Australia-a tour a neih tumin a ni a, hetah hian puiin an inkawmngeih zui hle nghe nghe.

    An rama hriat a hlawh hnuah hian Lil Bibby-a Grade A Productions leh Columbia Records nen thawhhona an siam nghal a, kum 2020 khan Juice Wrld nen thawk dunin ‘Go’ tih chu an hlawhtlinpui hle a, Billboard Hot 100-ah No. 52 lai an kai phak a ni.

    Kum 2020 khan a mixtape hmasa ber, ‘F*ck Love’ chu tichhuakin Australian ARIA Charts-ah No. 1 a hauh phak a, Australian solo artist zinga he chart-a a chung ber dinhmun hauh thei naupang ber a ni hial a. He hla hi US Billboard 200-ah a chung berah a awmpui bawk.

    Heng bakah hian Howard-a hi a hla, ‘Without You’ chu Miley Cyrus nen sa dunin an hlawhtlinpui hle a. Bieber-a nena ‘Stay’ chu Billboard Hot 100-ah top 10-ah an lanpui a. ‘Stay’ hi chawlhkar sarih chhung zet No. 1 ni hial a, tunah erawh Adele hlain a pawt thla rih tawh.

    Chawimawina pawh a dawng nual a, APRA Award, ARIA Award pahnih leh National Indigenous Music Award a dawng tawh a. American Music Award leh Grammy Award dawng turin tum hnih ve ve, MTV Video Music Award dawng turin tum thum leh People’s Choice Award dawng turin tum li zet vawrh chhuah a ni tawh bawk.

    Tunah hian Los Angeles-ah a nu leh a nau nen an cheng mek a. Australia palai anga inngaiin an ram tihlar a tum hle a, kum 2020 atang khan social media leh TikTok user Katarina Deme nen an inzui mek.