DOWNLOAD OUR APP

Read latest news on your phone
app-store
titi ZALEN : Bairabi Hydel Project leh Kei
Feb 07, 2024

-HF Rohlupuia


Bairabi Hydel Project megawatt 120 pe chhuak thei, Brig. T Sailo leh kha tih hunlai a power minister Pu Lalhmingthanga ten harsa taka rambuai kara an atchilh hnu a sawrkar dinglehin an chhunzawm loh avanga kan ram leh hnam hmasawnna in a tawrh nasat zia hi inchhut ve ngai em?. Khang hunlai khan high school Headmaster ka ni ve a, Brig T. Sailo-a’n kawlphetha (hydel power) a atchilh zia leh a pawimawhna mipuite min zirtir nasat zia kha ka ngaihtuah chang hian vawin ni thlenga power (kawlphetha) a kan intodelh loh chhan leh kan rualawhzia hi ngawih­bopui mai harsa ka tih avangin ka rawn thailang ve a ni, kan thalai lehkhathiam (intellectual circle) ho te hi an khawngaih­thlak in ka va lainat tak em.


UT hunlai khan chengkhat mah seng lovin central sawrkar sum hmangin hydel project hi kan hman senloh siamchhuah (gene­rate) theih a ni a, mahse, kum 1984 MLA Election ah PC party paihthla a Congress I party Pu Lalthanhawla kaihhruai a lo pian khan, Pu CL Ruala power minister anih khan a hma a sawrkar siamtu PC hma­chhawp chhunzawm duh lo mai pawh nilo a, a harsat zia leh engemaw maimai mipuite min zirtir a, Hydel project puitling pakhatmah siam chuang silo in micro hydel project leh small hydel project te reuh te te buaipui in hma an la ve a, mahse, vawiin thlengin kha poli­cy diklo khan hydel power a rual­awhna chauh lo chu engmah min hnutchhiah lo anih hi.A zahthlak in ava pawi tak em.


Hman zan lawk ah Dinthar ah ka riak a zankhua in current a awmlo a ka phone in a thih phah lehnghal a ava zahthlak tehlul em. Insawiselna lam leh sawichhiat duhna vang ni hauhlo in voi nga (5) lai chief minister ni tawh Pu Lalthanhawla pa fel ve tak awm a ka ngaih mah se, project puitling ram hmasawnna tur thawk tak tak silo a, Vawkte leh Rangva sem leh mahni party bil congress party mi leh sa chauh induhsakna leh huapzo sawrkar ka din ang ti ve si a Vohbik sawrkar (congress party mi duhsakna) chauh kalpui a hleih nei taka kum 30 chhung lal an han hrawt kha han chhut vang vang hian ram hmasawnna chu sawiloh zanin thleng hian kan hnungtawlh phah a, kawlphetha indaihlo reng rengin nutling patling kan buai zo ta vek a nih hi.


Congress sawrkar a tla a MNF sawrkar Pu zoramthanga kaihhruai a lo ding leh a,MNF sawrkar pawh hi,"Zûnteii nu ka siam ang che lungngaihna riak lungngaihna riak"tih ang mai eiruk pawh an thiamlo an ei lang hawng hawng mai a ni. Kan CM Pu Zoramthanga kawm ngeih zawng lah Tangka sum ngainat hi sual tinreng bul a ni tihtheihghilhtu kum reilo te chhunga hausa tawntaw leh kan thenawm Silchar changkanglo deuh Muslim mizo nupui nei tih angreng nen Mizoram budget an han in eiruksiak a, Lengpui airport an chuan chim thei tawk, ava zah­thlak tehlul em.


Tunhma a min chung entu leh kan mithiam hmasa ten an lo enkawl thin hnam changkanglo deuh NEFA (North East Frontier Agency) Zangkawl tukho pawh kan tluk tawhlo, zahna chang an la hrelo lehnghal a, Pu Zoramthanga phei chu pa kawmnuam leh titi thiam a thawh a thawh aia a sawi a sawi thiam zawk a nia, kan ropui lo tlang ngawt mai, Mahse vawi 3 lai Mizoram pumpui lalber Chief Mi­nister ani thei miau a, mipui lam pawh hian ka zirlo ve a ni lo maw? Mahni theuh i in enfiah ang u.


Kan ngaihsan zawng (Value system) lah hi inchhawng sang neih leh car manto inneihsiak vel a ni a, heti reng reng chuan ram ropui tak kan thleng har ngawt ang Mizo te hi Pathian in rethei turin min siam lo a, hnam ang pawhin hnam huaisen thuawih thei hruaitu azira kawng hrang hranga hruai nuam leh hmasawn duhna in kan khat zawk a ni.


Tunlai hian mipa hi kan hnungtawlh hrut hrut a, hmeichhia hi an pawng ang tual tual a, Mizo tlangval te hian puanven sawi­chhingin tan kan lak tak tak loh chuan a la pawi ngawt ang. Eng­lekhawle hmanni lawk ah kan in­thlang a, congress hun a liam a, MLA pakhat an tling tawk a, MNF hun pawh a liam tan a, mipuiin an chhangkham ve tawh aniang MLA 10 chiah an tling a, BJP-in congress MLA let chiah pahnih an nei a, eng tak ang zel ang maw?


A tawp ber ah chuan sawrkar hmasa thiltihthat chhunzawm duhlohna leh mahni vua leh vang te leh party bil induhsakna hian mizoram leh hnam hmasawnna a ti sukuk zo vek ni hian ka hre thin. Ram changkang ah ram hmasawnnan a thlawna tangka sem policy ah an neih ngailo reng reng. Kan nula leh tlangval lehkhathiam rual hmasawn chaka tuihal fel tak tak te leh mahni intodelh tum, Baal hma a thingthi ngailo rilru nei tak tak te hi kan ram hruaitu ten an zir chuan naktuk lawk ah nula leh tlangval entawn tlak kan thenawm state te pawhin an tlukloh leh chung en an la ni dawn a ni.


Engpawh nise, kan ram hian hma a sawn kan duh tak tak chuan thil dang zawng zawng aiin power and electricity (hydel project) a kan intodelhna tur tuikhuah lian tham megawatt 200 tal pe chhuak thei kan neih Tuivai te hi kan khuah vat vat a ngai a nih hi. Mizo kan ni kan hmel a tha kan tum a sang bawk si. Hnamdang hmusit mai lo in Japan ram China leh USA te hi thian ah siam ila an hausakna kan hmang tangkai ang a, awlsam te in kawlphetha hman sen loh kan nei mai dawn alawm.


Eiruk leh hlepruk duhna thinlung (Moral corruption) hi paih­bo ila kan ram hmasawnna hnukpui : thingtlang mi rethei zawk te khai chhuah na tur leh an taihmakna te rinawmna leh nun thianghlim tak Dikna te mipui thinlungah tuh ila, Neitu nihna thinlung (Sense of ownership) pu ila Mizoram zimte mihring lah Arla tuizat lek hi kan thenawm state ten hun reilo te chhung in min chung en mai dawn alawm. Hawh u, i tangrual ang u, kei kei ti lovin nang nang ti ila Zoram nuam thang leh thar te tan kan siam dawn nia. Hei erawh min chhang teh, I hun i hmang tha em? Thiltha tiin sualna do la nunna kawng dik zawh la chatuan lawmna i nei ang. Hun danglam tawhlohnaah chuan  engpawh nise kan thlen chin atang hian hma i sawn zel ang u.

Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh