Rev. L. Rema

Phone : 9862860181

Kum 2012 February, ni 22 khan Mizoram atangin China ram Sichuan Province Garze District Sinlung (Chhinlung) khua a hmun ngeia han tlawh turin ka zin chhuak a. Burma ram paltlangin China ram Yunnan Province Mangshi khuaa awm ka rawngbawlpui Rev. Yanjinfu-a nen March ni 15 khan China bus hmangin Sichuan province lam panin kan chhuak a. A kar kawng a thui hle mai a, ni 19 March, 2012 khan harsatna tam tak paltlangin tluang takin Sinlung (Chhinlung) khua chu kan thleng ta hlawl mai a. “China ram Yunnan Province Mangshi khua atanga Sichuan Province Yalong luikama awm Sinlung/Chhinlung khaw leilung kan rapna video chu Youtube-ah “Chhinlung Lamtluang” tiin a hmuh theih ang. Evidence tha tak a tling pha turah ngai ila.

Hmar Pi leh pute chuan Sinlung/Chhinlung khua an chhuahsan dan hla thu hmangin an lo sawi (Hmar hlabu hluiah)

“Khaw Sinlung ah kawt siel ang ka zuong Suoka mile nel lo tam e hriemni hrai ah”

A hla thu Duhlian tawngin

“Chhinlung khua atangin Sial a huanga A zuang chhuak angin kan zuang chhuak a,

Mihring fate an lo tam hle mai.”

Chhinlung chhuak Zofate hian, Chhinlung chhuak kan nih thu ah kan lungawiin kan lungrual tlang hle mai a. Chutih rual chuan Chhinlung chu thawnthu nge? lungpuk nge? lei khur nge? ti zawhna chu chiang fekfawka sawifiah thei Zofate zingah hian kan tam lo hle awm e. Mizo chanchin ziaktu hmasa Rev. Liangkhaia te pawh khan Chhinlung chanchin hi chiang fekfawkin a ziak thei bik lo a ni awm e.

Tunlai Mizo History ziaktu leh chhuitu Professor, Doctor (Dr.), Engineer (Er.), IAS, MCS-te, degree sang pui pui neite pawh hian Chhinlung chungchang chiang fekfawka sawi thei kan vang hle mai. Mizorama matric zirlaibua “Mizo Chanchin” tih thupui hmanga ziaktu pakhat chuan, “Pipute titi ah chuan Mizote hi Chhinlung chhuak nia sawi a ni a, hei hi a tlanglawnin hlaah te pawh a lar hle a, thenkhat chuan Chhinlung hi China ram khawilaiah emaw awmin an ring a, mahse vawiin ni thleng hian a awmna hriat a la ni rihlo. Hmasang titi satliah pawh a ni mai thei” tiin matric kan zirlai khan kan zir a nih kha. Vawiin ni thlengin matric zirlai ten an la zir chhunzawm zel niin ka hria.

Awle, matric zirlaibua Chhinlung awmna hmun hriat a nih loh thu leh hmanlai pipute titi satliah ang chauhva zirlaibu ziaktu hian a tarlang hi hnam pawi sawina hialah a ngaih theihin ka hria.

Kan pipute khan Chhinlung chhuak kan nih thu hi ziakin lo dah thlip thlep lo mah se, hla thu atangte leh tawngkam atangte hian Chhinlung chhuak kan nih thu hi an sawi uar hle thin a nih kha.

Tin, kan pipute khan khawchhak lam atanga thlangtla kan nih thu an sawi chhunzawm thin avangin thlangtla kan awm chuan thlangtla ve lo te pawh awm zel turah ngai ila. Chhinlung chhuak Mizoram te, Manipur ram te leh Burma ram Chin state thlenga thlangtla ve lo hnam pawh China ram Yunnan Province leh Sichuan Province-ah te khian an la tam em em mai a, chungho hnam zingah chuan Rawang hnam te khi an pumrua leh an pianhmang ah te, tawng in an danah te khian hmanlaia an pi leh pute leh hmanlaia kan pi leh pute kha khawkhat ram khatah, unau niin an lo khawsa ho tawh a ni tih hi tlang tla velo tawng leh thlangtla keini Zofate tam tak a inan dan atangte hian chhulkhat kual Zofate kan ni e tia sawi hi a pawm a nuam ber mai.