- C. Lianzama

Electric Veng, Aizawl

Ph - 9612459909

Zu hi thil tha lo, sual lailet dêrah kan sawi châmchi a; thlavâng hauh ni pahfawmin a thatzia i han sawi ve thung teh ang. Hmasang ata tawh, hnam tin chi tin zînga a serh zinga a mei ang maia bet ve tlat zu hi mihring chang lo nungcha te pawhin an lo duh êm êm vek mai a lo ni. Zufe hi khawmualah han vawrh ila khawmuala chêng, a lian a tê, ke nei leh nei lo, thla nei leh nei lo, nungcha tinreng te'n phung zînga piring vawrh ang maiin an inchuh zo vek zèl. Lui lamah pawh chuti bawk; a chhûnga cheng nungcha chuan chan loh hlauin kar loah an lo inchuh zo ve dial zél a, chêngkawl lamin an lo ruihpui a! Kan ran vulh te ngei tân pawh a thatzia kan hria. Chuti taka hringfa leh nungcha te thil duh tlân chu, nunna atan thil tha a ni tih a hriat reng mai.

Zu hi natna chi hrang hrang tan damdawi tha a ni a. Hmeichhe nau nei chak lo leh fel hlel deuh tân te hian that riauna neia an sawi thin hi. Doctor te pawhin damdawi atân mite an chawh thin a, pum damdawi atân zu/wine tlem in thin tûra thurawn pawh Bible-ah kan hmuh nghe nghe hi mawle (1 Tim. 5:23). Pachhiat theihnghilh nan Zu in tura thurâwn pawh Bible-ah kan hmu (Thuf. 31:17), Pathian tâna inserh hrang bâk mi naran tan Zu in phal a nih thu te pawh (Numbers 6:20). Kana khuaa mo lawm ang khan, kan pi leh pute khan chhiatni thatniah leh Kût niah te induhsak tawn nån, hlim taka nun ha nân an lo hmang tangkai thin.

Taksa chaklo leh hah tawngkhawng tân te hian chakna leh damna petu tha zet mai a ni a Hnathawh hah luat vång emaw e that tåwk loh vâng emawa taksa char deuh ngawih ngawih tân te hias Zufâng ang te hi han rian deuh tlauh tlauh ila kan harh våk mai a, taksa pawh a mâm kâwng kâwng mai. Assam Chief Secretary pakhat pawhin a Officer-puite hnenah, "Chhûnah hah hnêpin hna in thawk a, zânah te hi chuan in lamah intithawvengin Zu in nachång hria ula, in tân a tha a ni" tiin a fuih a. Mifing chuan hahdam nân te, hlim nân te, hrisel nân te, khaw vawt lutuk laka inven nån te leh thu sawitu leh ziaktu tân te, thian insiam nån te tangkai takin Zu hi an hmang thin a lo ni.

China thufing pawhin "Mi­fing chuan Zu hi thian siam nan a hmang a, mi à erawh chuan insual nån a hmang" tiin a lo sawi rêng a. Mifing chuan hmasang atang tawhin thian siam nån an lo hmang tawh thin. Salem lal Melkisedeka, Pathian chungnungbera Puithiam pawh khan Abrama nen thiana insiam nan Zu an hmang a (Gen. 14:18) Israel te'n Pathian nên inlaichinna tha siam nån Maichama nitin thil hlanah Zu an telh thin (Exo. 29:40) Ram hrang leh ram hrang Sawrkar aiawh te remna zawnga an inbiaknaah, inbiakna kal tluan nana pawimawh tak, thiana insiam tawn nan Zu hi a lo pawimawh hle âwm asin. Khual tha (tourist) te an lo dawnsawn nân te pawh, a tel lo chuan khuang lo a chai a an duh hmel khawp ang. Mifing chuan Zu hi thil tha thlentirtu, taksa that nån, thian siam nan, hlim taka nunho nån leh induhsak tawn nân an hmang thin a lo ni.

'Mi a' erawh chuan Zu chu insual nån mahni intihchhiat phah nån leh thil tha lo tinreng hring chhuaktu atân a lo hmang ve thung a. A hman dân tûr angin a hmang thiam lo a, a hun leh hmun pawh thlu lo leh insûm lo lekin a in zel a, sum leh pai leh hriselna bakah nungchang hial hloh phahin a lo awm ta a, thufing sawi angin, thil zawng zawng hlohtu a lo ni ta. Naupang, chem hriam hman thiam loh vanga mahni khûp sat ta ang main, Zu chu mahni intihchhiat nån a lo hmang ta a nih chu.

Hetiang mite hi mahni tána tha tur hre thiam lo, mahni hma takngial pawh sial thiam lo an ni a, an chhiatna tûr an tilui ngat ngat mai a ni. Mahni hma sial thiamho lah hi a zualzapui vahlenhlo Zoram hmelma No. 1-na tih hial, ei rûk ching an lo ni leh lawi a! Anni pahnih hian an thiltih dik lo, kan ram hmel tibâltu hi sim ve ve ta se, kan ram hian a nawm phah lehzual ngei ang le.

Zu hman thiam loh vânga chhiatna thleng thin mawhphurtu chu 'Zu a ni' kan ti a, thiam loh chantirin sual tinreng bul tiin kan dem a, khap tur niin kan hria a Zu khap tlatna dân te kan siam ta hial rêng a nih hi. Ngun taka ngaihtuahin, Zu chu nge maw dem tûr a hmang thiam lotu mihring chu le? Damdawi (drugs) hmang sualtu chu, damdawi aia dem tûr a ni angin Zu hmang dik lotu chu khuahkhirh zawk åwm a va ni em! Chem hriam chu naupang khawih phak lohah a dah theih a, Zu erawh 'mi a' khawih phâk loha dah a theih ve loh, anmahni zawk chu thununna hnuaia dah a tha ang. Zu ni loin a hmang khawlotu hi a ni Bible pawhin a khak thin chu (Ephesi 5:18).

Zu te, Drugs te, Chem hriam te hi hmang thiam lotu tân chuan an hlauhawm a, hmang thiamtu tan erawh tha tak an ni tih chu kan hre thiam tlång tawh ang chu. Zu hi a tha asin.