- Joseph L. Ralte (Send your feedback to whatsapp 9862566772)

“Economic Growth” kan tihfo hi thil ropui leh khirhkhan a ni hranpa tehchiam lova. Chhungkua, veng, ram reng reng hian siamchhuah, dehchhuah, tihchhuah a neih tam poh leh sum lakluh alo pung a. Chhungkaw hausa, ram hausa ni tur chuan thawkchhuaktu an tam a ngai a. Ei tur, in tur, thuamhnaw, thingpui dawr, lu-met/sam-met, doctor, driver, motor siamtu, contractor, zirtirtu, sumdawng adt. an lo tam poh leh thawkchhuaktu an pung tihna a ni a. Thawkchhuaktu an tam chuan "Production" a lo tam a. Hnathawk thiam an pun emaw thiam taka hnathawh dan an hmuh phei chuan “Productivity” a sang a. Ram a lo thang a, a lo changkang thin a ni.

Thlai thartu-in thlai a thar a. Ei tur siamtu-in lo leisakin ei tur a siam chu midang-in an lei a. Ei tur siamtu chuan a thil hralhna pawisa chuan kawr-mawi a lei ve thung a. Kawr-mawi hralhtu chuan a dawr kal nan taxi hire a ngai a. Taxi driver chuan petrol a lei a ngai ve thung a. Petrol zuartu chuan oil company atangin petrol a la chhawng a. Oil company chuan oil laichhuak turin engineer a ruai a, khawl lian pui pui a hmang a, labour tam tak a mamawh a. Oil lo sawngbawltu a ngai leh a. Hnathawktu chuan a hriselna enkawl turin doctor a mamawh a. Tute emaw an an intibuai a, lawyer a ruai ve leh a. Heng thil kalkual vel hi mamawhtu leh leitu an awm tih an hriat theuh avangin anmahni zawn theuhvah hna an thawk mai a. Chu chu Economist te chuan “demand and supply” an ti mai. Chumi inherkual vel chu “economic growth" siamtu chu alo ni ta mai a. Alo inherkual tam poh leh hmasawnna alo kal nasa ta mai a ni.

In sa-tu chuan bawngtu­thlawh leh suahdur ringawt a hman chuan a hnathawh a sawt har hle. Bawngtuthlawh leh suahdur ringawt hmangtu chu eng anga zei leh chak pawh nise hna thawh a sawt thei lova, a hlawh tam thei lo. Mahse, mi pakhat chuan operator thiam nal tak hmangin JCB (earth mover) a hmang a, hun reilote-ah awlsam takin kut-a hnathawktu thawh let 100 lai pawh a thawk thei a. Mahse, khawl tha leh manto tak pawh awm se khawl tuaivirtu tha leh thiam (skilled operator) a awm si loh chuan khawl manto thlawn a ni dawn a ni. Mahse, operator thiam takin JCB chu a hmang a, leivung chu tipper truck lian-ah a chhung a, tipper truck chuan khawpui daifema tu ram ruakah emaw leivung a va chhung a. Leivung a chhunna ram neitupa chuan remhre takin in a sa a, hotel a sa a, sum tam tak a hailut leh ta thung a. Chutianga hnathawh dan awmze nei leh mumal chu Scottish economist Adam Smith-a chuan “Division of Labour” tiin a lo phuah a. Chutianga hnathawh tur insemzai thiamna leh kalphung siam thiam apiang he khawvelah hian an "Productivity" a sang a, Economic "Efficiency" an nei a, an lo ding chhuak ta thin a ni.    

Thil pawimawh tak chu engtinnge hnathawktu chuan hlawkna a hmuh a, sumpai virvel chu mumal taka a kal kual tih lai hi a ni a. Chutianga awmze mumal leh fel taka eizawnna hrang hrang che vel chu economist te chuan “Institutions” an ti ta a ni. Chu chuan hnathawktu sum lakluh te, sumdawnna neitu nihna thute, market inzawm dan te, kudam leh phurh kualna (logistics) te, sumdawng leh sumdawng inremna thute, tihsual tuartu an awm loh nana dan leh hrai hung biktu mumal a awm leh awm lohte chuan a chunga kan sawi zawng zawng hi a phuarkhawm vek a. Chu “Institution” chu a mumal a, hlawk taka hnathawk theia a chet theih phawt chuan ram sum leh pai, ei leh bar dinhmun alo tha ta mai thin a ni.

A nachang hre lo, ngaihtuahna hmang lo ram hnufual leh hnuaihnungah thung chuan in satu chuan a leivung paihna a hre lo ang a. Leivung phurtu chuan khawiah emaw a ruka paihna a zawng ang a, pollution a siam ang a, khawtlang huat a hlawh ang. Ram chhunga a ro hlu "resources" pawh tangkai a hman thiam lovin a vat rem mai mai anga. Humhalh leh tihpun nachang pawh a hre lo ang. Chutiang ang ram hnufualah chuan loneitu, ranvulhtu, inhlawhfa, sumdawng tenau chuan mahni phuahchawp dan danin hma an la ve ang a, thawh phu lovin tangka a lalut tlem ang a, a risk huai leh pawisak neilo te’n an lalut tam deuh vang a, mahse a ngelnghet chuang lovang. Inkhualtelem a ni.

Eng ram mai pawh hi a tir atanga hausa thut an awm lova. An inzir a. An insiam tha a. Hlawh zawka hna thawh dan an zawng zel a. An lo changkang chho mai hlawm a ni. A then chuan kum 10 an mamawh a. A then chuan kum 20 an mamawh a. An rama khuanu dah malsawmna (resources) that dan a zirin a danglam thin. Hnathawktu chu hna thawh dan thiam tura zirtir an ngai a. Hnathawk thiam (skilled workers) an lo tam chuan ram hmasawnna hnuk (human capital) an lo ni ta thin a. Chutiang “human capital” chu tharchhuah, dehchhuah, tih­chhuah tipung tura thuam chak an ngai a. Thuam chak tur chuan nichina kan sawi “Institution” tak kha awmze neia din leh duan a ngai ta a ni. Chu “Institution” siam tur chuan hmathlir neih a ngai a, kalphung tur duan a ngai a, ruahmanna (planning) tha leh tihhlawhtlin dan tur fing tak (strategy) siam a ngai ta thin a nih chu.

Ram hrang hrangin hmasawnna bulthut haichhuah nan Agriculture hi bultan nan an hmang deuh vek a. Vanduaithlak takin agriculture hi tihhmasawn harsa ber a ni deuh zel. Khamkhawp leh zawrh khawp tharchhuak tur chuan irrigation a ngai a, fertilizer a ngai a, tractor leh khawl dang hmanga lo neih chu mechanize a ngai. Khawl thil leh hmanraw changkang manto hmang tur chuan ram tha leh zau, khawl tha chhawr manhla tur khawp hmunhma alo ngai leh a. Mizoram ang siam zawl zawl chawp ngaiah phei hi chuan hralh tham, ram sum dinhmun siam tha dawrh khawp thar chhuah chu a harsa khawp dawn a ni. Chuti anih avang chuan kan intodelh lovang tihna ni lovin thil man man chi leh hralhna lama harsa lo thlai chin erawh kan thiam a ngai tihna a ni. Ei leh bara intodelh hi intodelhna rabhi pawimawh ber ani hran lova. Kawng danga ei leh bar tur hnianghnar taka leina tur kan thawhchhuah theih tho chuan intodelh na kawng zau tak a awm tho a ni tihna ani ber awm e.

Europe ah te, America-ah te, India ah te thleng pawhin Agriculture sector lamah mipuiin hma an la hmasa ber a. Agriculture hi eizawnna pui bera an neih hunlai zelah hmasawnna a muang zel a. Agriculture atanga thilsiam chhuah (manufacturing) lam bawha khawl thiltihtheihna hman tangkai lama a tlan hnu-ah hmasawnna a zuang zel an ti. Europe ah chuan Industrial Revolution alo thlen hma khan hmasawnna a hnungtawlh a. Industrial revolution lo thleng erawh chuan engkim a thlak danglam thung a. Industry-a inhlawh tura an rawn tlanchhiatsan Agriculture an ram ruak tam tak chu industrial revolution khawl thiltihtheihna hmangin an enkawl let ta thung a. Productivity alo lian thar leh a. Agriculture leh Manufacturing a kalkawp thei ta a. Hmasawnna a zuang thei ta thin a ni.

Factory alo thang lian a, mi hmantlak mamawhna alo pung a. Manager, engineer, accountant, technician, marketing executive, financial expert, designers leh security thlengin mamawhna alo sang a. Chutiang hna a tam poh leh sumpai virvel alo tam a. Sumpai virvel alo tam poh leh chhiah a lut tam a. Hmasawnna kawng hrang hrang ruahmanna a lo awm thei a. Ram alo changkang ta thin a ni.

Khawvel huap economist ropui Raghuram G Rajan leh Rohit Lamba te chuan “How Do Countries Grow Rich?” tih an article an ziak a. An ziak loh dan ang deuh zar zar hian Mizoram chu kan kal thung a nih awm hi maw??