July ni 13: SBI atanga thu kan dawn danin vawiin atang khan Tlabung SBI Bank leh ATM te chu hman theih lohin a awm a, kar leh tawp lam hian siamthat an in beisei a ni.

"Tlabung branch-a hnathawhna atana hman khawl pawimawh chu a kang chhia a, vawiin atang khan bank leh ATM khar tan niin kar khat hnuah siam that theih kan beisei a ni," tiin SBI lam chuan an sawi.

"Tun tuma electric kalsual vanga kang chhe ta hi internet signal sem chhuaktu khawl pawimawh tak router a ni a, a thlakna tur chah nghal a ni a, kar leh kar tawp lamah engineer ten rawn kengin siam that hman beisei a ni," tiin Tlangbung SBI Branch Manager chuan ZALEN a hrilh a ni.

He thil thleng hian mipui a nghawng na dawnin hriat a ni a, kan thudawnna dangin a sawi dan chuan SBI hi Tlabungah hian dawrtu ngah ber a ni a, 70% vel chuan an dawr a ni.