July 4, 2022; Central YMA leh PHE department in July ni 2, Inrinni a 'Tlawng lui fintu lui thenfai hnatlangpui' an huaihawt ah, Mission vengthlang - Tlawng road huam chhung a thawkchhuakte chuan, 407 truck trip 5 zet bawlhlawh tawih thei lo (plastic kaihhnawih) an chhar khawm a, a hmun halral thahnemtak an nei bawk.

Central YMA hnuaia Science & Environment Sub committee hruaituten ZALEN an hrilh danin, July ni 2 a Tlawng lui fintu lui thenfai hnatlangpui neih chu awareness ang chauh a la ni a, PHE te nen hmalak chhoh zel tum niin, a bikin Aizawl-ah nasa zawk a hmalak chhoh zel tum a ni.

Science & Environment Sub committee hruaitute chuan, Aizawl bulhnaia an hnatlanna chin ah an rin ai daih a bawlhlawh (plastic kaihhnawih) a tam thu an sawi a, Mission vengthlang - Tlawng road a hnatlangte ringawtin tawih theih lo an chhar khawm pawh 407 truck trip 5 a tlin thu leh kawngpui a ken chhuah peihawm loh leh ken chhuah theih loh, plastic kaihhnawih thahnemtak a hmuna halral an neih thu an sawi.

Thudawnna te chuan tawih thei lo bawlhlawh an chhar khawm tam ber chu plastic bottle a nih thu an sawi a, a lan dan ah mipui ten kawngpui sir a kan thehthang, ram leh lui dung thleng thla ta te a nih thu an sawi. Inrinni a tawih thei lo bawlhlawh 407 truck trip 5 an chhar khawmte hi PHE lamin a paihna man tumin, trip 1, Rs. 6,000 in, Tuirial a AMC bawlhlawh sawngbawlna hmun-ah paih a ni.