Aizawl: Government Hrangbana College, Eco Club leh Aizawl Forest Division tangkawp te chuan Aizawl tui lakna Tlawng fintu Serlui tifai in nilengin hnatlang an nei.
Serlui thianfaia thawkchhuak te hi an college Principal Lalhmingthanga’n thusawiin a fuiha, an hnathawh tur chu mitin nghawng a nih avangin thahnemngai taka thawk turin a hrilh a ni. Serlui -ah Aizawl Water Transmission Division a SDO, PHE Dr. Z.R.Thasangzuala leh a staff te leh Maubawk Branch YMA ten lo dawng sawngin hun an hmang zui nghal a ni. Awareness petu Dr. Z.R. Thasangzuala, SDO Aizawl Water Transmission Division, PHE chuan Aizawl tui lakna ber Tlawng hi vawn thianghlim a ngaih zia te, fur lai chuan tui luankawr (side drain) a bawlhhlawh paih te tlawng-ah a len thlak thin avangin tui pump harsa khawp in a awm fo thu a sawi.
Zirtawpni hnatlanga zirtina petu dang Vanlalchhuanga, Finance Secretary Maubawk Branch YMA chuan YMA in kumpuan a neih Ram leh Hnam Humhalh a nih ang ngeiin thing, mau leh nungchate venhim hi kan tih tur a nihzia a sawi lang a. Tlawng dung leh Serlui chu Maubawk Branch YMA huam chhung ami niin an humhalh tlat thu a sawiin Tlawng dunga ramngaw awm leh ramsa leh sanghate hi YMA in a humhalh chhan ber pawh lui tui, Aizawl chawmtu ber tan a nih thu a sawi a ni.
Eco club te hian nilengin Serlui dung a bawlhlawhte hi an chhar khawm a, bawlhlawh tlingkhawm hi Truck trip khat (1) a tling. Hnatlang ah hian Government Hrangbana College Eco Club member, Zirtirtute, PHE Staff leh Maubawk Branch YMA hruaitute mi 100 lai an thawkchhuak a ni.