Aizawl: Zirtawpni khân Mizoram ENVIS (Environmental Information System) Hub buatsaihin Women’s Polytechnic, Aizawla Eco Club member-te chuan World Water Day 2019 lawmna hun an hmang a, Tlawng luia PHE Water Treatment Plant Site-ah plastic bawlhhlawhte leh lui tibawlhhlawhtu hnawmhnawk ho chhar khâwmin an hnatlâng.
Kumina World Water Day thupui hi ‘Leaving no one behind’ tih niin mi tinchu tui chungchangah mawhphurhna nei vekin, tui tihthianghlim leh tui thianghlim dawn kawngah pawh chanvo leh mawhphurhna mipuiin an nei neih thu chu thuken ah an hmang.
ENVIS Hub hotute chuan Eco club member hnatlanga thawkchhuakte chungah lawm thu sawiin plastic paih mai mai chuan kan luite a tihchhiat nasat theihzia leh hâl a nih pawha boruak a tihbawlh hlawh nasatzia te, plastic lam chi rêng rengte chu a tawih ral ve theih loh avang leh tihriral dân tha a awm mumal loh avangin a tlem thei ang ber hmanga plastic bawlhhlawh titlem tura hmalakna kawngah tan la zel tur leh mi dangte pawh zirtir zêl turin an fuih a ni.
Sawrkar laipui chuan bawlhhlawh hal (Open burning) a khap a, Mizoram sawrkâr pawhin nikum 2018 December thla atang khan khapna thupek hi chhuahin hal luite chu Rs. 25,000 thleng Environmental Compensation atan chawitir theih an ni a. He khapna thupek hi Aizawl district-ah chuan Mizoram Pollution Control Board-in kengkawhin district dangah chuan DC-ten an kengkawh.