Aizawl : Aizawl Press Club-ah April 19, 2022 khan Save Tlawng lui project flag off programme hman a ni a; he hun hi Ngurthanzaua Sailo, management chairman in a kaihruai a, Upa B Hmingthanruala, Jubilee Presbyterian Kohhran, Mission Vengthlang chuan hunserh hmangin Pathian hnenah a hlan a, Lalrozama IAS, Secretary Sports and Youth Services chu khuallian niin a flag off.

Flag-off hunah hian R Lallawmsanga, management secretary in report pein project a sawifiah a. He project ah hian Romalsawma (Roma) chuan tlawng hnar Zobawk atanga tanin Bairabi ah tawpin a zawh chhuak dawn a ni. Roma hian Plastic waste in Tlawng a tih bawlhhlawh zia leh plastic waste management ngaihpawimawh a tul zia khua leh hmun remchang apianga awareness a nei ang a, Tlawng tui bawlhhlawh zual te a enfiah ang a, chumi hmun khua leh lui pawh tute hnena awareness te neiin Tourism spot atana hmun tha leh remchang zawnchhuah hna te a thawk dawn a ni.

He project hi PHED Aizawl Watsan Division, Aizawl Municipal Council, Tourism Department leh Zote Bakery ten an sponsor a. He project hi adventure club pathum East India Campers Adventure Club, Zotrek Adventure Club leh Mission Vengthlang Adventure club te nen țangruala buatsaih a ni, heng bakah hian a bulțanna Zobawk lamah hian Lunglei Adventure Club ten an lo tawiawm dawn bawk a ni. Flag off programme hman zawh a nih hnu hian Lunglei pan nghal a ni a, he project hi ni 10 -15 chhunga zo an tura inbuatsaihna a ni.