Aizawl: Mizoramin Tourism Kûtpui, International Tourism Mart (ITM), November 16-19, 2022-a a thlen chhungin exhibition neihna, Aizawl Sipai Lammuala dawr neite an beisei aiin an inhralh tha a, chhun leh zanah chhimtu an tam thin hle.

ZALEN-in biak Aizawl Sipai Lammuala stall hrang hrang nghak sumdawngte chuan ITM atan theihtawpin inbuatsaihna an nei tih an sawi a, a bik takin ei leh in lam zawrhna dawr nghaktute chuan an rin phak aia mipuiin an hlut avangin ni khat tla tura an ngaih tlak loh nite pawh an nei tih an sawi.

Stall nghaktu sumdawng thenkhat zingah ITM zawh hma a an bungraw tiral zo te pawh an awm tih a hmun tlawhtu ZALEN palai chuan a hmu a, ni khat a Rs. Nuai 1 chuang man inhralh te pawh dawr engemawzah an awm. An 'Firm' hming hriatzui reng tawh tura ITM hlawhtlinpui zui turte pawh firm engemawzah an awm dawn niin a lang.

Kutpui chhimtu mi engemawzahte pawhin, ITM boruak chu nuam an tih thu ZALEN zawhna chhangin an sawi a, stall hrang hranga an thil phochhuah/zawrhte pawh lei lem loh pawh a tlawh man hla tham nia an hriat thu an sawi.

A hmun a police duty te chuan, a hmunhma buatsaih dan a felfai vangte, ruahmanna a that vangte in, chumi mil chuan kutpui chhimtu mipuite pawh an rawn khawsa nia an hriat thu ZALEN an hrilh a, rui buai leh buaina siam zawng a khawsa pawh an awm mang loh thu an sawi.