ZALEN January 14, 2025: Labour, Employment, Skill Development & Entrepreneurship (LESDE) changtu Minister Lalnghinglova Hmar chuan vawiin khan Government Industrial Training Institute (ITI), Aizawl ah khuallian niin Toyota Technical Education Program (T-TEP) chu a hawng. 

He training programme hnuaiah hian Toyota Kirloskar Motor Private Limited (TKM) chuan Govt. ITI a zirlaite tan General Technician (mechanic) course zirtirna a pe dawn a ni.

LESDE Minister chuan Govt. ITI chungchang sawiin Minister chuan kum 60 chhungin thalai te hnenah eizawnna tlak thiamna chi hrang hrang petu pawimawh tak a nih thu a sawi a. Sawrkar pawhin a ngaihpawimawh thu leh building sak thar a nih tur thu te, a bulhnaia hmeichhe hostel sak tum a nih thu te a sawi bawk.

Toyota Technical Education Program (T-TEP) hi kum 2006 khan bultan niin India ram state hrang hrangah ITI/Polytechnic /diploma institution dangte thawhpuiin zirlai thahnem tak an lo train chhuak tawh a. Mizoram hi he programme an kalpuina state 27-na a ni. Training na hmunhma institute in a lo neih sa te chu an company standard mil turin a tul dan anga thuam tha in, Course atana material/equipment ngai zawng zawng chu Toyota Kirloskar Motors in an tum a. 

Zirtirtu tur hi company in a train chhuah hmasak bakah guest instructor an kal thin bawk a. Course hi kum khat chhung a rei niin course tawpah exam an pass chuan Toyota Certificate pek an ni ang. Tun tumah hian mi 24 an training phawt ang.

T-TEP hawnna programme ah hian kalkhawmte lawmna thu Govt. ITI Principal PC Lalhriatpuia, chuan a sawi a. Toyota Kirloskar Motor Private Limited Executive Vice Chairman leh Country Head ni bawk Vikram Gulati chuan thu sawi bawkin he hmalakna hmanga thalaite tan eizawnna kawng siam chu an thil tum lian tak a nih thu a sawi. P.A Balusubramanaim, General Manager chuan T-TEP chungchang sawifiahna neiin, Vice President Arun G. Nair chuan zirlai pahnih hnenah Scholarship a hlan a. Zote Toyota aiawhin Zorammawia Tochhawng chuan thu a sawi bawk a. General Manager Sachin Sharma chuan lawmthu sawiin hun a khar a ni.