Aizawl August 30, 2022 :  Attorney General, Supreme Court thupek angin September 1, 2022 atang hian Mizoramah ‘lirthei khalhtu dan bawhchhia hremna dan thar’ hman a ni dawn. Dan tharah hian hremna a na/sang hle a, chutihrual Traffic Police Superintendent of Police, Sr. SP Rodingliana Chawngthu chuan a nih anga anga hman a nih loh tur thu leh ngaihhnathiamna a awm tur thu a sawi.

Dan thar an siamah hian Mi 2 aia tam inphurh chu Cheng 1,000 chawi theihna a nih bakah an license thla thum chhung atan tihtawp theih a ni a, dan hlui angah chuan hetiangah hian cheng 100 chawitir thin a ni. Hemi chungchangah hian naupang pahnih/pathum phura School hruai thin atangin ZALEN chuan zawhna a dawng thin a, he zawhna hi Superintendent of Police, Traffic zawh a ni a, Sr. SP Rodingliana Chawngthu chuan, "Minors-ah chuan chutianga khauh vak theih a ni lo. Officer dang te nen pawh dan thar chungchang hi kan sawiho tawh a, na taka kalpui kan tum hran lo," tiin ZALEN zawhna a chhang.

Dan tharah hian Dan hlui a awm lo, hman thar tur pawh a awm nual dawn a, hemi chungchangah hian Traffic SP chuan, "A dan hi a khuah piah lamah a rawwng a, a nihna angin kan hmang lo ang, pawisa pawh a hniam lam zela chawitir an ni ang," a ti. 

Transport department Director Er. R. Lalrammawia hnen atanga ZALEN-in thu a lo dawn tawh danin, dan thar hi Attorney General, Supremce Court of India chuan ‘Motor Vehicle Ammendment Act 2019’ siamin, hei hi parliament-ah pawm a ni. Supreme Court dan siam chu state sawrkarin a tidanglam thiang lo a, sawrkar laipuiin ti tura a tih state-in a ti lo a nih chuan Article 356 of the Constitution of India (Presidents Rule’s-a dah) chu state sawrkar chungah lekkawh theih a ni. 

Transport director chuan kum 2019-a dan siam ni tawh mah se, Supreme Court thuchhuak a nih vangin hman ngei a ngai tih sawiin, hemi vang hian September 1, 2022 atanga hman turin an ‘notify’ (puang) tih a sawi.

September ni 1, 2022 atanga dan thar hman tur chu, dan zawm tan hlauh tur a awm lo tih Transport director chuan sawi bawkin, kumtlinglo a lirthei khalhtir te, license nung lo/nei loa lirthei khalhte, helmet khum loa lirthei khalhte leh dan hrang hrang zawm lote hremna erawh a nat/san dawn thu a sawi bawk.

Hremna dan thar tlangpui (in Rs.)

Dan bawhchhiatna             Dan hlui    Dan thar
Hremna vantlang            100    500
Thupek zawm lo            500    2,000
License nei lo            1,000    5,000
Valid license nei lo            500    5,000
Lirthei tih len/danglam        New    5,000
Phal aia chaka khalh        400    1,000 LMV/ 2,000 MPV
Hlauhawm taka khalh        1,000    Upto Rs. 5,000
Zu rui a khalh            1,000    10,000
Kawngpui a intlansiak        500    5,000
License tidanglam            New     10,000
Thu thei zat aia tam phur        New    1,000 per extra pasenger 
Seat belt hreng lo            100    1,000
Helmet khum lo            100    1,000 + disqualification of license                                                                                                 of 3 months
Mi 2 aia tam inphurh            100    1,000 + disqualification of license                                                                                            of 3 months
Ambulance etc. kian duh lo        New    10,000
Insuarance nei lo/ thi lirthei khalh    1,000    2,000
Kumtling lo lirthei khalhtir        New     25,000 +kum 3 lungin tan theih