June 8, 2023; Aizawl khawpui chhung a traffic duty point hrang hrang zingah Bawngkawn, Sairang road junction chu duty harsatna leh buaithlakna ber hmun nia ngaih a ni.

Traffic police duty thenkhatte hnen atanga ZALEN thudawn danin, Bawngkawn point hi kawngpui pengthuam tamna hmun a nih vangte, lirthei ke pahnih nei atanga a lian ber thlengin an zawh tam avangin, zan lam thlengin duty a buaithlak thin niin an sawi a, indaih pawh a ngai thin niin an sawi.

Traffic duty thenkhatte chuan kan khawpui mil aia tam lirthei a awm tawh nia a lan avangin khawi hmunah pawh duty hrim hrim chu ngawrh a ngai niin an sawi a. Kawngpui peng thuam lian lai ah te, a bikin peak hour ah te phei chuan khawi hmunah mah inthlahdah hman a ni lo tih an sawi.

Hetihlai hian tun dinhmun ah Aizawl MZ01 lirthei awm zat chu 2,40,000 chuang a tling tawh.