Traffic jam tihziaawm- na tur PAHOSS atan Rs Nuai 1,124 hmang tawh

Admin - Nov 14, 2021

1,454 atangin mi 404 thlan tawh an ni

Aizawl; Lirthei tam lutuk avanga Aizawl khawpui traffic tawt lutuk tiziaawm tura duan, Parking House Support Scheme (PAHOSS) hnuaiah in sak tanpuina dil mi 1,454 an awm tawh a, vawiin thlengin PAHOSS atan state sawrkar sum cheng nuai 1,124.80 hman tawh a ni.

RTI Act hmanga UD&PA department-a zawhna, SPIO-in a chhan danin, Aizawla PAHOSS dawng turte chu North Zone, South Zone, East Zone leh West Zone-ah then a ni a, tun thlenga tanpuina dil mi 1,454 atangin mi 404 thlan tawh an ni bawk a ni.

PAHOSS hi kum 2019 atangin Aizawlah kalpui tan a ni a, 2019-2020-ah cheng nuai 917.60 hman niin, 2020-2021-ah cheng nuai 78.30 leh kum kal mek 2021-2022 chhungin cheng nuai 128.90, a vaiin cheng nuai 1,124.80 hman a ni tawh.

RTI chhannaa tar lan a nih danin PAHOSS kalpuina sum hi state sawrkar sum atanga hmuh niin, engtik thlenga kalpui tur nge tih chu sawrkar thutlukna tur a ni. PAHOSS hnuaiah hian mi pakhata pawisa pek tur zat bituk a awm lo a, tun thlengin tanpuina dawng tawh zingah hma la tha lo action lak ngai an la awm lo.

Sak zawh hun tura sa zo lo emaw, sa lo hrim hrim emaw, sak tura ruat sa aia tlem sak emaw a awm a nih chuan a tanpuina dawn sa chu 1st installment a dawn atanga 15% interest nen pek lettir theih niin sak zawh tawh pawh a nihna tur anga hman a nih loh chuan building chu kharsak theih a ni.

PAHOSS Rs Nuai 20 aia tam dawng tawhte (Nov 10, 2021 angin)

No. Hming                   Veng                              A hmun                       Pek tawh zat (lakh)

1. Haulianthanga        Ramhlun North              Ramhlun South             33.20
2. R. Rohmingliana     Ramhlun North               Bawngkawn                  29.90
3. Vanlalrengpuii        Dam Veng                       Dam Veng                     73.50
4. CL. Ramdinthara    College Veng                   College Veng                20.80
5. H. Lalramliana        Salem Veng                     Salem Veng                   42.40
6. Lalrinliana Sailo      Upper Republic               Republic VT                  56.40
7. K. Lalduhawmi       Republic VT`                    Republic VT                  24.00
8. Lalrinmawia           Zemabawk                       Zemabawk                    29.40
9. R. Zothankhumi     Khatla                              Khatla                            22.40
10. Sangchungnungi    Zarkawt                        Khatla                            21.60

Share now