Aizawl July 12, 2022 : Kolasib District -a Medical Superintendent tura sawrkarin thuchhuah a siam zawm lo doctor pathum ten an hna tur an zawm duh loh avangin vawiin khan MJA Kolasib district chuan Medical Superinetendent charge la, Dr. Ramdinthari chu thil awmzia an zawh hnuah vawiin khan Medical Superintendent thar Dr. Samuel Lalfakawma Fanai chuan a hna thar a zawm. 

Kolasib District MJA hruaitute chuan Kolasib District Medical Superintendent (DMS) charge la mektu Dr. Ramdinthari (Madini) chu Mizoram sawrkar-in Kolasib DMS tura a dah ten an hna an zawm duhloh chungchang ah thil awmdan an zawtfiah.

Kolasib District MJA te hriat danin, kumin May ni 23 khan Mizoram sawrkar Health Department chuan Kolasib DMS thin Dr. Doris Lalnunmawii Sailo chu Aizawl Civil Hospital ah sawn in, a aiawh turin Dr. Rita Zoramthari, Aizawl Civil Hospital a thawklai chu an dah a, Dr. Rita Zoramthari hian chhuanlam siamin Kolasib DMS hna hi a zawm duh lova, thla hlui June ni 1 khan Dr. Rita Zoramthari aiah Dr. Zorengpuii, Aizawl Civil Hospital-a mi chu Kolasib DMS turin sawn a ni leh a, a ni pawh hian DMS hna hi a zawm duh loh avangin June ni 10 khan Kolasib District Hospital a thawklai Dr. Ramdinthari (Madini) hi DMS hna kawp tura tihna order chhuah a ni.

June ni 23 khan Aizawl Civil Hospital a thawklai Dr. Vanlalhruaii Fanai chu Kolasib DMS turin sawn ani leh a, ani pawh hian chhuanlam siam in DMS hna a zawm lo a ni. July 5, 2022 khan Kolasib District Hospital-a thawk lai Dr. Samuel Lalfakawma Fanai (Child Specialist) chu Kolasib DMS turin dah a ni a, vawiin 12.7.2022 chawhnu lam khan DMS charge la mektu Dr. Ramdinthari hnen atangin charge a la a ni.

Kolasib DMS thin Dr. Doris Lalnunmawii Sailo in charge a hlan ni 31.5.2022 atanga ni 12.7.2022 chhung hian Dr. Madini hian DMS hna hi a kawp a, Kolasib District Hospital OPD ah Ultrasound a enkawl tel bawk.