Tun hnai khan India rama state pakhat atangin chanchin dangdai tak hriat tur a awm a, chu chu chhungkaw pa ber rai thu a ni. Kerala-a nupa tuak khatte chu an nihna an thlak (transgender) hnuah a mipa zawk Zahad chuan nau a pai a, nau nei mai thei dinhmunah a ding der mai! 

Kum 21 mi Ziya Paval leh a kawppui Zahad (23) te hi kum thum liam ta vel khan an intawng a, nupa niha fa neih hial an duh ta. Paval hi a pian tirh chuan mipa a ni a, tunah erawh hmeichhia a ni tawh. Zahad erawh a tirah hmeichhiain a piang a, tunah erawh mipa a ni ve tawh thung. Zahad hi transgender ni mah se a pianpui a mipat hmeichhiatna erawh tih danglamin a awm si lo a, a lan danah mipa ang mai ni mah se nau a pai ta heu mai a ni. 

Ziya Paval leh Zahad te hian photoshoot an nei a, an thlalak hi social media-ah an pho lang zui. An thlalak hi social media lamah a viral zui a, an chanchin hian mi ngaihven a hlawh zui ta hle a ni. Transgender actress S Negha chuan, "Transgender te hian an mihringpuite ang bawkin dikna chanvo an nei a, chhungkaw din hi an phu reng a ni," tiin a sawi. 

India ramah hian transgender hi maktaduai hnih vel awm anga chhut an ni a, activist te chuan hei ai pawh hian an tam niin an sawi. Kum 2014 khan Supreme Court chuan thuchhuah a siam a, transgender te chuan mihring dangte ang bawka dikna chanvo an neih thu a sawi a ni.