ZALEN August 24, 2023 : Transport Department chuan Vahan database thenfai hna an kalpui atangin lirthei kum 15 tling tawh, registration ti fel lo 51632 an blacklist tawh tih an sawi a, heng zinga 130 hi sawrkar lirthei a ni.

Nimina chanchinthar lakhawm tute a kawmnaah Transport Minister TJ Lalnuntluanga chuan, Vahan database-ah hian lirthei kum 15 tling tawh, registration renew zui lo thahnem tak a awm tih a sawi a, chung lirthei te chu enchiangin, lirthei tam tak chu a neitu hriat tawh lo an ni a, lirthei awm tawh lo a, chhiah ba ngaihsak lo engemaw zat a awm. Heng lirthei te hian record a tihbuai avangin record felfai tak a awm thei nan hma lak a ni, a ti.

December 31, 2019-a lirthei registration nung tawh lo 45646 te chu January 21, 2020 khan a neitute hnenah registration renew turin hriattirna pek an ni, November 20, 2020 khan hriattirna pek nawn leh an ni a, December 15, 2020 ral hma ngei pe tura tih an ni a, hun pek chhunga registration renew lo lirthei 43137 te chu February 18, 2022 khan Blacklist an ni ta a ni.

January 1, 2020 to December 31, 2021 chhunga lirthei registration thi 8708 te chu April 7, 2022 khan an registration tifel tura hriattir an ni leh a, heng zinga registration renew lo te chu Blacklist leh an ni a, hemi tum hian mimal lirthei 8365 leh sawrkar lirthei 130 te chu blacklist-ah dah leh niin lirthei blacklist zawng zawng hi 51632 an ni.