Aizawl: Transport Minister leh Champhai South bialtu MLA ni bawk, T.J. Lalnuntluanga chuan Zirtawpni khan Champhai khawpui tuam chhuaka inkalpawhna kawngpui Ring Road Project siam hnuaia hmalak lehna tur Tlangsam-Zote inkar kawngpui siam dan tur a enfiah.

Champhai Town Planning hnuaia Ring Road Project hmanga Tlangsam leh Zote inkalpawhna tur kawng sial thawh khatna tur hi UD&PA Dept. kaltlanga thawh tur a ni a. A thawh khatna hnuaiah Tlangsam atanga Zote panna kawngpui kilometre 4 vela thui chu metre 8 a zaua laih tum a ni a. Hemi bak kilometre 2.5 vela thui chu hmachhawp leh a tan dah a ni. Kawngpui siam hna hi a tul angte buaipui zawh a nih veleh kumin thal chhung ngeia thawh tan hman tum a ni. Ring Road Project hnuaia kutthlakna hmasa Champhai Zotlang leh Tlangsam inkalpawhna kawngpui kilometre 4.5 a thui laihzau leh siam that hna chu tunah hian zawh fel tawh niin white topping leh tura ruahman a ni.

Kawngpui siam dan tur enfiahnaah Law & Judicial Minister ni bawk T.J. Lalnuntluanga chuan khawvel changkang leh thang zelah hmathlir thui tak nei chunga khawpui tawt lutuk tur tiziaawm tura Champhai Town Planning duan anih thu a sawi a. “Hmalak awlsam hun bawhpelh lova a remchan lai tun hun zel chu chhawr tangkai thiam a tul a, ramngaw tichereu lo thei ang ber leh leilet phaizawl humhalh chung zela hmalak tum a ni,” a ti. Kawng siam hna thawktu tur leh a viltu department mi leh sate chu ram tana rohlu hnutchhiah tuma theihtawp chuah turin a chah a ni.

Tlangsam-Zote inkalpawhna kawngpui siam tur enfiah zawh anih hnu hian Minister hian Champhai Venglai tlawhin, Official leh Village Council member-te nen Sub Centre tihchangtluna Bazar siam theihna turte, Venglai leh Bethel Veng inkalpawhna tur kawngpui siam anih theih dan turte a hmunah kalin an enfiah bawk a ni.