Aizawl; Mizorama Treasury lian ber Aizawl South Treasury in ni khat a pawisa a pek chhuah theih zat (ceiling) chu cheng nuai 130 a nih laiin, tun dinhmuna ni khata an pek chhuah theih zat chu cheng nuai 65 a ni.

Aizawl South Treasury officer hnen atanga ZALEN thudawn danin, ni khat a cheng nuai 65 ceiling an neih chu pelh miah loh tur tihna nilo in, a tul dan a zirin pelh (pass) theih a ni. 

Ni khat a ceiling an neih cheng nuai 65 ah hian sum pekchhuah ngai tul bik, mimal bill ni lo, contractor leh office bill ho te khung a ni a, thil tul dang, pension, sawrkar hnathawkte GP fund, medical reimbursement te erawh khung tel a ni lo thung.

Aizawl South Treasury officer sawi danin, ceiling an neih cheng nuai 65 a nih laiin, cheng Vbc. 2 chuangte an pek chhuah chang a awm reng thung. 

Sawrkar hnathawk group C leh D te chuan a pangngai angin thlatin hlawh an la thei a, group A leh B te erawh a tlangpuiin, thla thar ni 10 bawr velah an hlawh pek thin a ni a, thla liamta October thla hlawh erawh thla dang aiin hlawh an pe tlai a, November ni 16 atang khan hlawh pek an ni.

Mizoram sorkar chuan sum harsatna vangin sorkar hnathawk group C leh D-te hlawh tur siam hmasa phawt turin department hrang hranga drawing and disbursing officer (DDO)-te a lo hriattir tawh a. 

October 2020 atang khan group C leh D-te pek a nih hnuah group A leh B-te pek an ni. Hei hi tun thlengin kalpui chhunzawm zel a la ni.