Champhai tlangval style a dang ve det Kah hlum min tum," tih angreng deuh chi hi tunhmaa kan Mizo rapper ho chham chhuah duh zawng chi hi a ni a. Thiam lo leh phak lo chung chungin kan ngaihsante tihdan kan lo entawn a, an tihdan kan ching a, an awm dan zulzuia chet laka 'rap game' min luhpui mai an tum thin. Mahse, hlawhtling erawh an la awm lo a nih hmel a. Chutih laiin, Triau Trackx erawh chuan min deng na lawi si! "Rap game-a mi bik kan rawn ding chhuak," rawn ti thin mah se, din chhuah pui a hnekin deu-sawh an hlawh zawk mah niin a lang a. Anni lam pawh thawkkhat lai khan rawn ding chhuak mah se, tunah chuan an thawm a reh rih viau a. An rawn din chhuah tur rawn tlangau puiin, an vei zawng rawn sawi mah se, din chhuahpuitu tam tak an nei hauh lova, an thu leh hla te chuan zawm a hlawh mawh hle a nih kha — hei tak hi tuna kan rawn tarlan tum, tute emaw sawi dan takin 'Zo' taka rawn dingchhuak a TRIAU TRACKX ho chu! An music video pakhat an rawn 'hit' pui viau a, chu chu — 2 leh 4 tih kha a ni awm e. Facebook-ah a ni emaw, inkhel ennaah emaw an hla thu "Sawi sawi a ngai lo lâm la tawk," tih chu a lar hle a. Mizo rapper kutchhuakah chuan sawi zui hlawh leh thalaite pawhin an pawmpui ber pawl a ni phak pawh ti ila, a sual zawk zawk lo khawp ang - engtinnge ni zel dawn? 2 leh 4 music video an rawn in 'shake' pui hmain, music video an nei tawh a. Mahse, hriat a hlawh em em lem lo a, music video tha tak erawh a ni reng tho a, mi tam zawk hriat tak tak an hlawh lem lo khawp mai a. An music video hmasa erawh 'rap' a ni lem lo. Triau Trackx an nih avangin rimawi an duhzawng pawh 'kal khat' deuh turah kan lo ngai a ni mai thei a, anni chuan an kalphung hi chiang taka sawiin, "Member-te hi music tuizawng inanglo tak tak kan ni a, heivang hian chham chauh a khawih theihloh," an ti a. An sawi ang ngeiin an music video hmasa zawkah khan hmeichhe pakhat an zai pui a, lengzem hla niin a chham chi chu hriat tur a vang hle. Tuna an rawn lar pui 2 leh 4 (Hnih leh li) bakah hian tun thla chhungin music video pakhat tihchhuah an tum a, an phur tawh hle. Chu an hla thar February thlaa tihchhuah an tum chu "Ka Lo Nghak Reng Ang Che" tih hla a ni a. He hla hi Lalruatfeli'n a sak sak dawn a ni. "Ka Lo Nghak Reng Ang Che" tih hla hi lengzem emaw, fakna hla emaw bik ni loin, love song (hmangaihna hla) an ti deuh kher a. Hemi a nih vang hian Valentine's Day hmaa tihchhuah hman hram tumin hma an la a. A hla hian Pathian hmangaihna leh mihringte inkara hmangaihna a thupui ber dawn a, a ngaithlatu a zirin pathian hmangaihna nge mihring hmangaihna an hriat chhuah a dang nuaih ngeiin a rinawm. Kumin chu Triau Trackx kan ti chho zeuh zeuh dawn a nih hmel. Tun thla chhunga music video an tihchhuah theih hnuah, April thla khian hla thar neih leh an tum rilru deuh a, ti hlawhtling thei tak ang maw? April thla chhoah hla dangdai tak, lâm luih luihna lam chi hla "Zirtawp Zan" tih ringawt chu rawn chhawpchhuah an tum a. He hla video tur hi CCN chuan Champhai atanga music video hautak ber ni turin an sponsor dawn nia sawiin, "Keimahni pawh kan inbuatsaih nasa hle a, Gabriel Graphix in video min siam sak leh anga, Mizo hla awm tawhah chuan a 'Chhe Hot' ber pawl a nih kan beisei," tiin an sawi nghe nghe. An music video hnuhnung ber atanga an hla kalphung hi a danglam ve hrim hrim. Sawi tawh angin rap group ni chiah si lo, ni deuh reuh tho si hi an kalphung a ni deuh ber a. An rap chhunah lah Zo-Ze milin Mizo tawng nalh tak, a thluk leh thu inphaman takin an rawn chhawp chhuak thiam hi an danglamna pakhat a ni ve hrim hrim a. Rapper tam zawk, sap hla leh Mizo tawng nalh taka rawn pawlh 'rhyme' nalh tak taka rawn chhawpchhuak thin awm tawh mah se, rapper tam zawk hla thu te hi Mizo te'n kan nunpui leh tuipui phak meuh loh a ni em? An danglam ang-reng. Kan nitin tawng kauchheh hmangin hla thu mawi takin an rawn phuah chhuak a, kan zo-ze mil zawng anga rawn dingchhuakin, 'rap-game'-ah ni loin 'Zo-game'-ah min luh pui a. Mizo hla thu tam zawka hla rua te, metaphor leh simile te hi a theih chin chinah hmanloh hram an tum thu sawi mah se, hmang lo tawp erawh an ni lo — Champhai Triau Tracx style a dang ve det!