Aizawl January 28, 2024 : Mizoram sawrkar chuan ram hralh leh inhlanchhawn chungchangah hriattirna a chhuah thar a, tribal ni lo hnenah ram hlan phal a ni lo.

Sawrkarin Mizoram chhunga ram nei thei tar lante chu Mizorama cheng nghet leh an chhungte January 26, 1950 hma lama Mizorama lo cheng tawh emaw, India president-in Constitution Article 342(1) hnuaia Mizoram tan bik Schedule Tribe atana a puan te an ni, a ti a. Ram inhlanchhawn chungchangah sawrkarin phalna a pe hmasa a nih chauh loh chuan tribal-in tribal ni lo hnenah emaw, tribal ni lovin tribal ni lo dang hnenah emaw ram a hlan chawng tur a ni lo.

Sawrkarin phalna a pek hmasak ngai bikah chuan phalna a pe hmasa a nih chauh loh chuan inhlanchhawnna lehkha chu register theih a ni lo va, land record-ah pawh chhinchhiah theih a ni lo. Dan lova ram inhlanchhawn reng reng chu thu tlinga ngaih a ni lova, eng court-ah mah dan anga kenkawh theih a ni lo tih sawrkar hriattirna chhuahah chuan tarlan a ni.