Tribal Superstar
Jul 25, 2020
  • Ramchhana Hmar, Phuaibuang
  • Mahni nihna hriatchian tluka hlu hi a awm lo va, chu kan nihna chuan chapona tlangah te min hruai thleng thei a ni tih hriat tel erawh a tha khawp mai. Tin, kan nihna baka nun kan tumna hi tur hlauhawm tak min tichhe thei khawpa hlauhawm ang hi a ni, kan nun a nih avanga hleihluak taka khawsak kher hi he khawvela kan awm chhan pawh a ni hek lo. Chhia leh tha hre rual kan nih chuan kan nun dan tur awm tawk pawh hre tura ngaih kan ni.
  • Hnam tam tak te zinga tribal ti tribal tu ve mai kan nihna pawh hriat reng tur a ni a, tribal nih avanga thing uchuak leh khawvel changkanna pawh um zo lo khawpa khawsak tum kher pawh a tum awm lo ve. A awm leh a mawi hriat hi kan tih tur a ni. Thawmhnaw dawra thawmhnaw tam tak an zawrh kara kan inhmeh tur leh mawi, kan tana tha tur thawmhnaw kan lei theih laiin kan nunah hian a tha leh tha lo duhthlan awlsam tak karah a tha zawk thlan harsa kan ti fo thinte pawh ngaihtuahna luah ve thei tak a ni awm e.
  • Khawvel changkanna kan hmachhawn dan hi han thlir ila, thil tam tak a lo inherchhuak a, a tha leh tha lo te, a mawi leh mawi lo te tlengin thlan fuh leh thlan thiam pawh a har chang a awm mai thei e. Mahse, fimkhur taka he changkanna leh hmasawnna thilte hi hmachhawna hman thiam hi kan tih tur a ni. Nang leh kei hi kan duhna lam lama thle kual vel hman pawh kan ni lo, ram dang leh hnam dangte ngaihtuahin kan ram hian harsatna kan hmachhawn mek a, hmasawn zawng chuan kan kal na meuh mai, hmasawnna tluantling mite hriat thlaka kan hmasawnna erawh a tuan a thu deuh em?
  • Kan tapchhak zawl atangin Korean leh Turkey nula leh tlangval te eizawnna film siamte kan lo tuipui pawh a awm viau rualin kan nunah hian thu a sawi ta mah mah deuh em? Kan nulaten Mizo tlangval pasaltha (hero) an hmuh thiam loh laiin khawchhak tlangval zingah an tribal thinlung sak tak zawr hnawp khawpa chiah thei an hmu ta, social media-ah hian Mizo nula thawmhnaw hak tur pawh nei mumal lo te hian an thlalak an upload ngam ve angem tih pawh kan ngaihtuah ngai loh kha tunah chuan kan hai peih a thu a ni ta, hmuh tur a awm tam ta hle mai, mahni veng leh khuaah pawh mite ngaihsan leh entawn ni ngai lem lo khan, social media-ah chuan tribal super star nih tum niawm takin nuam kan chen a, hetiang thilah hi chuan tribal nih leh super star nih tum chu thil inhmeh a ni dawn em ni?
  • Invengah khan tlangval sek deuh deuh ei tur tui tha tha ei thin, ni tina inhlawhfa engzat nge awm? A sek leh a tha tha apiangte an inkhek khal a, engtikah tak lo che chhuak ve ang i maw, lock down leh hripui avangin hnam dangten duh angin kan ram min tlawhpawh thei lo, kan ramah hnathawh tur duh tan ni tina inhlawhna tur a va tam si em! Mi nuna buai lo tur ni chung si a, kan buai tlat thinte hi thahnemngaihna awka vang a ni tih hriat a va hun tawh em!
  • Nula vawkchaw khawn nih leh tlangval ration buhfai la nih te hi thil zahthlak a ni lo, mahni lakluh (income) nena inphu lo branded thawmhnaw hakte hi a zahthlak zawk. Tribal nih leh tuibur hmuam chunga super star nih tum tlat te, sahdah hmuam a, zozial pet kawk vu vu chunga a fing ber leh a hre ber nih tlum tlatna khawvel atang hian duplicate super star bak kan nih theih hi a rinawm loh; chuvangin, zuk leh hmuam lamah te pawh insum theihna nun neih hi ava hlu em!
  • Bawkbawn leh Behlawi bai hmeh chunga kan mi hmasa, central service-a tling theite kha super star dik takte an va ni chiang em, khatiang dinhmun thleng thei tura an thawhrimmna leh harsatna an paltlang zozai kha tunlai thangtharte chuan a ngaihtuah pawh kan ngaihtuah thiam pha meuh lo a ni. Siliper nena sang tak an thlen theih lai leh zirna mumal lo chung pawh a, mi tam tak zinga mi bik an nih theih chuan keini thangthar zawkte Adidas leh Puma rap hrual chung leh World class education hmachhawn mekte hi chuan kan mi hmasate hnung hi kan zui zo tur a ni ringawt mai, chutiang tur pawh a kan inbuatsaih a hun tawh hle mai, thawn chhuah aia lakluh a tam lutukte hi thalaite hian zak ila, a tihbo dan kawng dap ila, hmathlir fel tak neiin, taimakna leh tumruhna hmachhuanin hma lam pan ila, social media-ah chauh hian tribal super star nih tum lovin kan ram chhung leh kan tualzawlah ngei hian tribal super star nih i tum tlat ang u.

Latest News & Chhiar Hlawh